بەپێی راپۆرتە رۆژنامەوانییەكان چەكدارانی دەستەی تەحریری شام و گروپە چەكدارەكانی هاوپەیمانی، زیاتر لە نیوەی شاری حەڵەبی سوریایان كۆنترۆڵكردوە. روانگەی سوری دەڵێت، هێزەكانی سوپای سوریا بەبێ بەرگرییەكی ئەوتۆ پاشەكشەیان كردوەو تاوەكو ئێستاش زیاتر لە 277 كەس لە شەڕەكانی ئەم چەند رۆژەدا كوژراون.
ئاوێنە: بەپێی چەند سەرچاوەیەك لە سوپای سوریا كە قسەیان بۆ رۆیتەرز كردوە ئاماژەیان بەوە داوە كە لەدوای پێشڕەوییەكانی چەكدارانی تەحریر شام و گروپە چەكدارەكانی هاوپەیمانی لەنێو شاری حەڵەب، سەرلەبەیانی ئەمڕۆ شەممە، فڕۆكەخانەی حەڵەب و هەروەها سەرجەم ئەو رێگەیانەی دەچنەوە سەر شارەكە داخراون.
رامی عەبدولڕەحمان، بەڕێوەبەری روانگەی سوری، سەرلەبەیانی ئەمڕۆ شەممە، بە فرانس پرێسی وتوە، گروپە چەكدارەكان توانیویانە زیاتر لە نیوە حەڵەب بەبێ روبەڕوبونەوەیەكی ئەوتۆ كۆنترۆڵ بكەن و هێزەكانی سوپای سوریا پاشەكشەیان كردوە.
گرتە ڤیدیۆییەكان نیشانی دەدەن كە گروپە چەكدارەكان ئاڵای خۆیان لەسەر قەڵای مێژویی حەڵەب هەڵكردوە.
هێرشی دەستەی تەحریری شام و گروپە هاوپەیمانەكانی لە رۆژی چوارشەممەوە لە ناوچەكانی دەوروبەری حەڵەب لەدژی هێزەكانی سوپای سوریاو هاوپەیمانەكانی دەستی پێكرد.
روسیا وەك هاوپەیمانی سەرەكی حكومەتەكەی بەشار ئەسەد لە وەڵامی هێرشی گروپە چەكدارەكاندا، چەند ناوچەیەكی ژێر كۆنترۆڵی ئەو گروپە چەكدارانەی بۆردومان كردون.
لەماوەی هەشت ساڵی رابردودا ئەمە یەكەمین جارە كە گروپە چەكدارەكانی ئۆپۆزسیۆنی سوریا دەگەنە شاری حەڵەب، ئەو شارەی كە خوێناویترین ئابڵوقەی شەڕی نێوخۆی سوریای ئەزمون كردوە.
بەپێی قسەی روانگەی سوری، فڕۆكە جەنگییەكانی سوریا و روسیا دوێنێ هەینی 23 هێرشی ئاسمانییان كردۆتە سەر گروپە چەكدارەكان لە نزیك ئیدلب.
دوێنێ وتەبێژی وەزارەتی دەرەوەی توركیا داوای كرد رێگری لە ناسەقامگیری زیاتر لە ناوچەكە بكرێت و هۆشداری دا كە ئەم هێرشانەی دوایی دەبنە مایەی لاوازكردنی رێككەوتنەكانی كەمكردنەوەی گرژییەكان.
هێرشەكانی ئەم چەند رۆژەی گروپە چەكدارەكان، بە گەورەترین هێرش دادەنرێن لەدوای مانگی سێی 2020ەوە، كاتێك كە روسیاو توركیا رێككەوتنێكیان بۆ كەمكردنەوەی گرژییەكان و شەڕ ئیمزاكرد.
وتەبێژی كۆشكی سەرۆكایەتی روسیا دوێنێ هەینی رایگەیاند، مۆسكۆ هێرشەكانی گروپە چەكدارەكان بە پێشێلكردنی سەروەریی سوریا دەزانێت و وتیشی، ئێمە پشتیوانی لە دەسەڵاتدارانی سوریا دەكەین بۆ ئەوەی هەرچی زوترە، "دەسەڵاتی یاسا و دەستور" لەو ناوچانە بسەپێنن.
یاریدەدەری نوێنەری نەتەوە یەكگرتوەكان بۆ قەیرانی سوریا وتویەتی، لە ئەنجامی شەڕی ئەم چەند رۆژەی دواییدا لانیكەم 27 كەسی مەدەنی كوژراون كە بەشێكیان منداڵ بون.
بەپێی قسەی روانگەی سوری تاوەكو ئێستا لە شەڕەكانی ئەم دواییەدا 227 كەس كوژراون كە زۆرینەیان لە گروپە چەكدارەكان و هەروەها لەنێویاندا 28 كەسی مەدەنی هەن كە زۆربەیان بەهۆی بۆردومانی فڕۆكە جەنگییەكانی روسیاوە كوژراون.
روانگەی سوری ئاماژەی بەوەشداوە كە گروپە چەكدارەكان لە سەرەتای دەستپێكردنی هێرشەكەیانەوە زیاتر لە 50 شارۆچكەو گوندیان كۆنترۆڵكردوە.
شەڕەكانی ئەم چەند رۆژە بۆتە هۆی ئاوارەبونی زیاتر لە 14 هەزار كەس كە نزیكەی نیوەیان منداڵن ئەوەش بەپێی نوسینگەی هەماهەنگكاری نەتەوە یەكگرتوەكان بۆ قەیرانی سوریا.