بەرپرسانی ئیسرائیل و لوبنان دەڵێن، هەردولا گەیشتونە رێككەوتن لەسەر ئاگربەست لەنێوان ئیسرائیل و حزبوڵا و بەرپرسێكی لوبنانیش دەڵێت، رێككەوتنەكە لەماوەی چەند سەعاتی داهاتودا رادەگەیەنرێت.
ئاوێنە: ئاژانسی رۆیتەرز لە زاری بەرپرسێكی ئیسرائیلەوە بڵاویكردۆتەوە كە سبەی سێشەممە، ئەنجومەنی وەزیرانی ئیسرائیل كۆدەبێتەوە بۆ تاوتوێكردنی رێككەوتنی ئاگربەست لەگەڵ حزبوڵا و پێدەچێت لەماوەی چەند رۆژی داهاتودا شەڕ رابگیرێت.
ئاژانسەكە هاوكات لە زاری بەرپرسێكی لوبنانییەوە، بڵاویكردۆتەوە، واشنتۆن بەیروتی ئاگاداركردۆتەوە كە لەماوەی چەند سەعاتی داهاتودا، رێككەوتنەكە رادەگەیەنرێت.
هەروەها پێگەی ئەكسیۆسی ئەمریكی لە زاری بەرپرسێكی باڵای ئەرمیكاوە وتوشیەتی، ئیسرائیل و لوبنان گەیشتونە رێككەوتن لەسەر مەرجەكانی رێككەوتنەكەو پێشبینیش دەكرێت سبەی سێشەممە، ئەنجومەنی وەزیرانی ئیسرائیل رێككەوتنەكە پەسەندبكات.
ئەلیاس بو سەعب، جێگری سەرۆكی پەرلەمانی لوبنان بە رۆیتەرزی وتوە، "بەربەستی جدی" لەبەردەم دەستپێكردنی ئەو ئاگربەستەدا نین كە ئەمریكا بۆ ئیسرائیلی پێشنیاركردوە.
ئەلیاس بو سەعب، ئەوەشی خستۆتەڕو، بەپێی پێشنیارەكە، ئیسرائیل پابەند دەكرێت لەماوەی 60 رۆژدا لە ناوچەكانی سنورییەكانی باشوری لوبنان بكشێتەوەو هێزەكانی سوپای لوبنان لەوێ جێگیربكرێن.