وتەبێژی وەزارەتی دەرەوەی ئێران دەڵێت، رۆژی هەینی لەگەڵ وەفدی دانوستانكاری فەرەنسا، ئەڵمانیاو بەریتانیا كۆدەبنەوەو لەبارەی چەند پرسێك دانوستان دەكەن كە یەكێكیان پرسی ئەتۆمی ئێرانە.
ئاوێنە: ئیسماعیل بەقایی، وتەبێژی وەزارەتی دەرەوەی ئێران، ئەمڕۆ یەكشەممە، رایگەیاند، وەفدی دانوستانكاری وڵاتەكەیان رۆژی هەینی لەگەڵ وەفدی دانوستانكاری فەرەنسا، ئەڵمانیاو بەریتانیا كۆدەبێتەوەو لەبارەی "پرسە دوقۆڵییەكان، پرسەكانی ناوچەكەو پرسە نێودەوڵەتییەكان" لەوانە "پرسی فەلەستین و لوبنان و پرسی ئەتۆمی ئێران" دانوستان دەكەن.
بەرلەوە ئاژانسی كیۆدۆی ژاپۆنی لە زاری چەند سەرچاوەیەكی دیپلۆماسی ئێرانییەوە بڵاویكردبوەوە كە تاران و ئەو سێ وڵاتە ئەوروپییە رۆژی هەینی 29ی ئەم مانگە، خولێكی نوێی "دانوستانە ئەتۆمییەكان" لە جنێف دەستپێدەكەنەوە.
بەپێی قسەی وتەبێژی وەزارەتی دەرەوەی ئێران، ئەو دانوستانە نوێیانە، لەدرێژەی گفتوگۆ ئەنجامدراوەكانی وڵاتەكەیدا دێن لەگەڵ ئەو سێ وڵاتە لە پەراوێزی كۆبونەوەی ساڵانەی كۆمەڵەی گشتی نەتەوە یەكگرتوەكاندا.
ئەوەش لەكاتێكدایە كە رۆژی 21ی ئەم مانگە، ئەنجومەنی پارێزگارانی ئاژانسی نێودەوڵەتی وزەی ئەتۆم، بڕیارنامەیەكی چوار وڵاتی رۆژئاوایی پەسەندكرد و تێیدا ئێرانی لەسەر فراوانكردنی چالاكییە ئەتۆمییەكانی و هاوكاری نەكردن لەگەڵ ئاژانسەكە ئیدانە كرد.