وەزیری بازرگانی تورکیا، بە یاوەری شاندێکی باڵا دەگاتە عێراق و لەگەڵ سەرۆکوەزیران و بەرپرسانی باڵادا بە مەبەستی گفتوگۆکردن لەسەر چەند پرسێک پەیوەست بە پڕۆژەی گەشەپێدان کۆدەبێتەوە.
ئاوێنە: ئەمڕۆ دووشەممە، 18ی تشرینی دووەمی 2024، عومەر بۆڵات، وەزیری بازرگانی تورکیا لە سەردانێکی فەرمیدا بۆ عێراق، لەگەڵ محەممەد شیاع سوودانی، سەرۆکوەزیرانی عێراق و چەند بەرپرسێکی باڵا بە مەبەستی گفتوگۆکردن لەسەر دواین ڕێکارەکانی دەستکردن بە پڕۆژەی ڕێگەی گەشەپێدان کۆدەبێتەوە.
هاوکات وەزیری بازرگانی تورکیا لە چوارچێوەی سەردانەکەدا بۆ عێراق، پرسەکانی پتەوکردنی زیاتری پەیوەندییە بازرگانی و ئابوورییەکانی نێوان هەردوو وڵات تاوتوێ دەکات.
ئەمە لە کاتێکدایە، مانگی نیسانی ئەمساڵ بەسەرپەرشتی محەممەد شیاع سوودانی و ڕەجەب تەیب ئەردۆغان و نوێنەرانی هەریەکە لە قەتەر و ئیمارات، ڕەشنووسی ڕێگەی گەشەپێدان بۆ بەستنەوەی کەنداو بە ئەورووپا، لە ڕێگەی عێراقەوە، مۆر کرد.