ئا: كاوە ڕەش
پیاوێکی كورد بەناوی (ب.ف)، تەمەن ٣٠ ساڵ، دوای چاودێری كرد‌ن‌و گەڕان بەدوای هاوسەری پێشووی خۆی، سەرەنجام لەنزیك قوتابخانەیەکی سەرەتایی لەهەڵمەتێکی تۆڵەسەندنەوە دا، بەچەقۆ هێرش دەكاتە سەری‌و هەوڵی کوشتنی دەدات، بەو هۆیەشەوە دادگا سزای ٢١ ساڵ زیندانیکردنی بەسەردا سەپاند.
بەپێی لێدوانی پۆلیس، ئەو پیاوە هیچ ناونیشانێکی دیاریکراوی نیشتەجێ بوونی نەبووە لەبەریتانیا، ئەو لە 21ی ئایاردا هێرشی کردۆتە سەر هاوسەری پێشووی، دوای ئەوەی لەسەرانسەری بەریتانیا چاودێریی كردووەو شوێن پێی هەلگرتووەو چەقۆی لێداوە.
لە کاتی لێکۆڵینەوەکەدا قوربانییەکە بەئەفسەرەکانی وتووە کە چۆن لەکاتی پەیوەندیی و ژیانی هاوسەری لەگەڵ (ب)دا بەزۆرەملێ ئەوی کۆنتڕۆڵی کردووەو لەترسدا ژیانی بەڕێكردووە.
قوربانییەکە ئاماژەی بەوەش کردووە، چەندین جار هەوڵی داوە پەیوەندیی و ژیانی هاوسەری لەگەڵی كۆتایی پێبهێنێت، بەڵام تاوانبار بەردەوام زۆرەملێی لێكردوەو بەدوایدا ڕۆیشتووە.
قوربانییەکە لەو كاتەی بەڕێگاوە بووە لەناوچەی لوتۆن، کاتژمێر 08:30، لە٢١ی ئایار، نزیک قوتابخانەیەكی بنەڕەتی بەچەقۆ پەلامار دەدرێت و هەوڵی كوشتنی دراوە.
لە مانگی ئابدا (ب)، دانی بەتاوانەکەیدا ناوە كە چاودێری هاوسەری پێشووی كردووەو هەوڵی کوشتنی داوە، لەگەڵ ئەوەش دانی بەوەدا ناوە، کە ماددەیەکی تیغی تیژی هەڵگرتووە بۆ كوشتنی هاوسەری پێشووی.
هەربۆیە بەتاوانی پەلاماردان بەچەقۆو هەوڵدان بۆ كوشتنی دادگای تاجی لوتۆن، سزای ٢١ ساڵ زیندانی بەسەردا سەپاندووە، لەگەڵ پێنج ساڵی دیکەش بە مۆڵەت.
دادوەر، ئەلیسۆن هانتەر کەی سی، دەڵێ، ئەو هێرشە ترسنۆكانەو ترسناکە، مەبەست لێی تۆڵەسەندنەوە بووە.
دادگا ئاماژەی بەوەش داوە، كەچۆن قوربانییەکە لەبەر سەلامەتی خۆی، چەندین جار پەنای بۆ چەندین شوێنی جیاواز بردووە، بەڵام (ب)، چاودێری کردووە.
هاوكات ئەیما پیتس، سەرۆکی یەکەی پاراستنی گشتی پۆلیس، لەهەرێمی بێدفۆردشایر، ڕایگەیاندوە، تاوانەكانی دەستدرێژی و توندوتیژی خێزانی، بەهیچ شێوەیەک قبوڵ ناکرێت و هێزەکانمان پابەندن بەدادگاییکردنی تاوانباران.
ئەو خانمە ئەفسەرە دەڵێ، ئەوە هێرشێکی ترسناک و ترسئنۆكانە بووە بۆ سەر ژنێک، كە بەڕۆژی ڕووناک لەلایەن پیاوێکەوە ئەنجامدراوە، تەنها بەهۆكاری ئەوەی پەیوەندی نێوانیانی ڕەتیکردوەتەوەو كۆتای پێهاتووە.
ئاماژەی بەوەشکردووە، هیچ ژنێک هەرگیز شایەنی ئەوە نییە هەست بە نائارامی و ترس بکات.