سوپای ئیسرائیل رایگەیاند، ئەمڕۆ یەكشەممە، هێرشێكی بەرفراوانی ئاسمانیان كردۆتە سەر چەند پێگەیەكی حوسییەكان لە یەمەن.
ئاوێنە: سوپای ئیسرائیل لە راگەیەندراوێكدا وتویەتی، لە هێرشێكی ئاسمانی بەرفراواندا، چەند پێگەیەكی حوسییەكانیان لە ناوچەكانی بەندەری "رەئس عیسا" و "حەدیدە" لە یەمەن كردونەتە ئامانج.
سوپای ئیسرائیل وتوشیەتی، لەو هێرشە بەرفراوانەدا، شوێنی هێزەكان و هەروەها دامەزراوە بەندەرییەكانی هاوردەی نەوتیان كردونەتە ئامانج و وتوشیەتی، ئەو شوێنانەی كراونەتە ئامانج بۆ گواستنەوەی چەك لە ئێرانەوە بۆ یەمەن بەكارهێنراون.
حوسییەكانی یەمەن، لەبەرامبەر ئەو هێرشانەدا لە راگەیەندراوێكدا وتویانە، بەرەی مقاوەمەی یەمەن راناوەستێت و هێرشەكانیان بۆ سەر زایۆنییەكان بەردەوام دەبن.
سوپای ئیسرائیل وتوشیەتی، هێرشەكەی ئەمڕۆیان وەڵام بوە بۆ هێرشەكانی ئەم دواییەی حوسییەكان بۆ سەر ئیسرائیل.
حوسییەكان پێشتر بەرپرسیارێتی هاویشتنی ئەو موشەكەیان لە ئەستۆ گرت كە دو رۆژ لەمەوبەر ئاڕاستەی ئیسرائیل كرابو. ئیسرائیل وتویەتی، رێگری لە موشەكەكە كردوە.
هێشتا نازانرێت ئاستی زیانەكانی هێرشەكەی ئیسرائیل بۆ سەر یەمەن چەندە.
یوئاڤ گاڵانت، وەزیری بەرگریی ئیسرائیل لەبارەی هێرشەكەوە وتویەتی"پەیامی ئێمە رونە. بۆ ئێمە هیچ شوێنێك هێندە دور نییە دەستمان نەیگاتێ."