سوپای ئیسرائیل دەڵێت، لە هێرشەکەی دوێنێیاندا بۆ سەر باڵەخانەیەک لە بەیروت حەسەن نەسروڵا، ئەمینداری گشتیی حیزبوڵای لوبنان کوژراوە.
ئاوێنە: ئەڤیخای ئەدرەعی، وتەبێژی سوپای ئیسرائیل، ئەمڕۆ شەممە، لە راگەیەندراوێكدا وتی، سوپای ئیسرائیل، دوێنێ هەینی، حەسەن نەسروڵا، ئەمینداری گشتی حزبوڵای لوبنانی كوشت و هەروەها عەلی كەركی، فەرماندەی بەرەی باشوری حزبوڵا و ژمارەیەكی دیكە لە سەركردەكانی حزبوڵا كوژران.
وتەبێژەكەی سوپای ئیسرائیل ئاماژەی بەوەداوە، حەسەن نەسروڵا لە بۆردومانێكی دوێنێی فڕۆكەكانی ئیسرائیلدا كوژراوە كە كراوەتە سەر بارەگای سەرەكی حزبوڵا و بەقسەی ئەو لەژێر زەوی و لەژێر بینایەكی نیشتەجێبوندا بوە لە باشوری بەیروت و هێرشەكەش لەكاتێكدا ئەنجامدراوە كە سەركردەكانی حزبوڵا لە بارەگاكەدا بون.
جەختیشی كردۆتەوە كە سوپای ئیسرائیل بەردەوام دەبێت لە كردنە ئامانجی هەمو ئەو كەسانەی هێرشدەكەنە سەر هاوڵاتیانی وڵاتەكەی یان بانگەشە بۆ هێرشكردنە سەرییان دەكەن.