وەزیری تەندروستی لوبنان ئاشكرایكرد، لە بۆردومانەكانی ئەمڕۆی ئیسرائیلدا بۆ سەر وڵاتەكەیان، 274 كەس كوژراون و زیاتر لە هەزار كەسیش برینداربون.
ئاوێنە: لە سەرلەبەیانی ئەمڕۆ دوشەممەوە ئیسرائیل بەشێوەیەكی چڕ بۆردومانی ناوچە جیاجیاكانی لە باشوری لوبنان و بیقاع لە خۆرهەڵاتی لوبنان دەستپێكردوە كە هەندێك ناوچەیان بۆ یەكەمجارە لەلایەن ئیسرائیلەوە بۆردومان دەكرێت.
بەگوێرەی میدیاكان ئیسرائیل، ئەمڕۆ لانیكەم 300 جار بۆردومانی لوبنانی كردوە.
ئێوارەی ئەمڕۆ وەزیری تەندروستی لوبنان رایگەیاند، بەهۆی بۆردومانەكانی ئەمڕۆی ئیسرائیلەوە، تاوەكو ئێستا زیاتر لە 574 كەس كوژراون و 1024 كەسیش برینداربون كە لەنێویاندا ژن و منداڵ هەن.
وەزیری تەندروستی لوبنان ئاماژەی بەوەشداوە، خەڵكێكی زۆر لەو ناوچانەی كراونەتە ئامانج بەرەو ناوچە ئارامەكانی لوبنان ئاوارە دەبن و دەستیان بە جوڵە كردوە لەسەر رێگاكان قەرەباڵغییەكی زۆر دروست بوە.
ئەوەشی خستەڕو، پلانێكی فریاگوزاری دانراوە بۆ پێشوازی لەو كەسانەی ئاوارە دەبن بۆ داڵدەدانیان و پێشكەشكردنی هاوكاری پێیان.
پەیامنێری رۆیتەرز لە باشوری لوبنان رایگەیاندوە، دانیشتوانی باشوری لوبنان لەڕێی تەلەفۆنەكانیانەوە بە ژمارەیەكی لوبنانی پەیوەندییان پێوەكراوەو پێیانوتراوە دەستبەجێ لانیكەم هەزار مەتر دوربكەونەوە لە هەر شوێنێك كە حزبوڵای لوبنانی بەكاردەهێنێت، پەیامنێرەكەی رۆیتەرزیش هەمان پەیوەندی پێوە كراوە.