دوای هێرشەکەی ئیسرائیل، سوپای پاسداران ئامێرەکانی پەیوەندی قەدەغە دەکات
  2024-09-23       296       


دو بەرپرسی باڵای ئەمنیی ئێران بە ئاژانسی ڕۆیتەرزیان ڕاگەیاندوە، سوپای پاسداران فەرمانی بە سەرجەم ئەندامانی وڵاتەکەی داوە کە بەکارهێنانی هه‌مو ئامێرێکی پەیوەندیکردن ڕابگرن، ئەوەش دوای ئەوەی هەفتەی ڕابردو هەزاران ئامێری بێته‌ل و "واکی-تاکی" کە هاوپەیمانەکانی لە حزبوڵای لوبنان بەکاریان دەهێنن، تەقێندرانەوە.

ئاوێنه‌: یەکێک لە بەرپرسە ئەمنییەکان باسی لەوەکرد، سوپای پاسدارانی ئێران ئۆپەراسیۆنێکی بەرفراوان ئەنجامدەدات بۆ پشکنینی هەمو ئامێرەکان نەک تەنها کەرەستەی پەیوەندی، زۆربەی ئەو ئامێرانە یان لە ناوخۆدا بەرهەمدەهێنرێن یان لە چین و ڕوسیا هاوردە دەکرێن.

ئەو بەرپرسە کە بەهۆی هەستیاری بابەتەکەوە داوایكردوه‌ ناوی ئاشکرا نه‌كرێت، ئاماژەی بەوەکرد، تاران نیگەرانە لەوەی کە دزه‌كردنەکە ڕەنگە سودی بۆ بریکارەکانی ئیسرائیل هه‌بێت كه‌ لە ناوخۆی ئێراندا كارده‌كه‌ن، هه‌ربۆیه‌ لە ئێستاوە دەستی بە لێکۆڵینەوەیەکی هەمەلایەنە کردوە کە سەرکردە ناوەند و پلە باڵاکانی سپای پاسداران دەکاتە ئامانج.

ئەو بەرپرسە ئەمنییە وتی، ئەو پشکنینه‌ هەژمارە بانکیەکانیان لە ئێران و هەروەها مێژوی سەفەر بۆ  دەرەوەی وڵات دەگرێتەوە.

سێشەممەی ڕابردو تەقینەوەی هاوکاتی ئامێرەکانی پەیوەندی بێتەل (پەیجەر) له‌ لونان ڕویدا، کە گروپی حزبوڵای لوبنان بەکاریان دەهێنا، ڕۆژی دواتر سەدان ئامێر "واکی-تاکی" کە ئەندامانی گروپەکە بەکاریان دەهێنا، تەقینەوە، لە ئەنجامی ئەو هێرشانەدا 39 کەس گیانیان لەدەستداوە و زیاتر لە سێ هەزار کەسیش برینداربون.

لوبنان و حزبوڵای لوبنان دەڵێن، ئیسرائیل لەپشت هێرشەکانەوەیە، بەڵام ئیسرائیل ڕەتی نەکردوەتەوە و پشتڕاستیشی نه‌کردوەتەوە كه‌ دەست تێوەگلانی هەبێت.

ئەو بەرپرسە ئەمنیەییە ئامادەنەبو، وردەکارییەکان لەبارەی چۆنیەتی پەیوەندییەکانی هێزەکانی سوپای پاسداران کە ژمارەیان 190 هەزار کەسە، بخاتەڕو، وتی، "لە ئێستادا ئێمە سیستەمی نامە ناردنی کۆدکراو بەکاردەهێنین".

بە وتەی هەمان بەرپرس، نیگەرانییەکی زۆر لە دامەزراوەی دەسەڵاتدار لە ئێراندا هەیە، بەرپرسانی سوپای پاسدارانی ئێران لەگەڵ حزبوڵای لوبنان پەیوەندیان هەبو، بۆ ئه‌نجامدانی هه‌ڵسه‌ندگاندنی ته‌كنیكی، ژماره‌یه‌ك ئامێری په‌یجه‌ر كه‌ ته‌قێنراونه‌ته‌وه‌ ره‌وانه‌ی ئێران كراون بۆ پشکنین له‌لایه‌ن شاره‌زایانی ئێرانییه‌وه‌.
 

زۆرترین بینراو
© 2025 Awene Online, Inc. All Rights Reserved.
×