له‌میانه‌ی نمایشێكی سەربازیی سوپای وڵاته‌كه‌یدا كه تێیدا چه‌ند موشەکێکی نوێی بالیستیک‌و فڕۆکەیەکی بێفڕۆکەوانی هێرشبەر نمایشكرا، مەسعود پزیشکیان، سەرۆک کۆماری ئێران ڕایگەیاند، "تواناکانی بەرگری ئێران ئەوەندە گەشەی کردوە كە هیچ وڵاتێك ناتوانێت بیر لەهێرشەكردنە سەری بكاتەوە".
ئاوێنه: ئه‌مڕۆ شه‌ممه، سوپای پاسدارانی ئێران له‌ساڵیادی شەڕی هەشت ساڵەی لەگەڵ عێراق نمایشێكی سەربازیی ئەنجامداو پەردەی لەسەر موشەکێکی نوێی بالیستیک و فڕۆکەیەکی بێفڕۆکەوانی هێرشبەری پێشکەوتو لادا.
مەسعود پزیشکیان، سەرۆک کۆماری ئێران لەمیانی بەشداریی لەنمایشه‌كه‌دا ڕایگەیاند، "تواناکانی بەرگری ئێران ئەوەندە گەشەی کردوە کە هیچ هێزێکی شەیتانی ناتوانێت لەمێشکی خۆیدا بیر لەبوێری شەڕانگێزی بەرامبەر خاکی ئازیزمان بکاتەوەو تەنانەت خەیاڵیشی بۆ بکات".
وتیشی، "ئێمه توانای ئەوەمان هەیە كە بەیەکگرتویی وڵاتانی ئیسلامی، کەرامەت‌و شانازی نیشانی ئەوانی دیکە بدەین، هەروەها بەیەکگرتویی دەتوانین ئیسرائیلی قۆرخکارو خوێنمژو جینۆسایدكەر بوەستێنین".
وته‌كانی مەسعود پزیشکیان له‌كاتێكدایه، وڵاته‌كه‌ی هه‌ڕه‌شه‌ی وه‌شاندنی گورزی سه‌ربازی به‌هێز له‌ئیسرائیل ده‌كات، دوای ئه‌وه‌ی سه‌ره‌تای مانگی ڕابردو ئیسماعیل هه‌نییه، سه‌رۆكی مه‌كته‌بی سیاسی بزوتنه‌وه‌ی حه‌ماسی فه‌ڵه‌ستینی له‌تارانی پایته‌خت به‌ئامانجگیراو له‌لایه‌ن ئیسرائله‌وه كوژرا.
