وەزارەتی تەندروستی لوبنان رایگەیاند، لە زنجیرە تەقینەوەكانی ئامێرە بێتەلەكانی ئەمڕۆی وڵاتەكەدا، نۆ كەس كوژراون و زیاتر لە 300 كەس برینداربون.
ئاوێنە: ئەمڕۆ چوارشەممە، ژمارەیەك لە ئامێری بێتەلی دیكە لە لوبنان تەقینەوە، ئەوەش لەكاتی رێوڕەسمی بەخاكسپاردنی ژمارەیەك لە قوربانیانی تەقینەوە هاوشێوەكانی دوێنێی ئەو وڵاتەدا بو.
وەزارەتی تەندروستی لوبنان لە راگەیەندراوێكدا ئاشكرایكرد، بەپێی ئامارە سەرەتاییەكان تاوەكو ئێستا لە تەقینەوەكانی ئەمڕۆدا، نۆ كەس كوژراون و زیاتر لە 300 كەسی دیكەش برینداربون.
ئەوەش لەكاتێكدایە كە پاشنیوەڕۆی دوێنێ سەدان ئامێری پەیوەندی ناسراو بە پەیجەر کە لەلایەن ئەندام و چەکدارانی حیزبوڵا و بەشێکی خەڵکی لوبنان بەکاردەهێندرێن، لە لوبنان تەقینەوە و بەو هۆیەوە دو هەزار و 800 کەس برینداربون و 12 کەسیش گیانیان لەدەستدا.