‏‎عومه‌ر گوڵپی ‏‎ئه‌ندامی لیژنه‌ی دارایی له‌ خولی پێنجه‌می په‌رله‌مانی كوردستان رایگه‌یاند، داهاتی مانگانه‌ی فرۆشتنی نه‌وتی هه‌رێمی كوردستان له‌ڕێگه‌ی تانكه‌ره‌وه‌ 405 ملیار دیناره‌ و ده‌شڵێت، "به‌شێك له‌م ده‌ستهاته‌ بۆ تێچوی به‌رهه‌مهێنانه‌و ده‌درێته‌ كۆمپانیاكان، ئه‌ی ئه‌ویتری چی لێدێت؟".

‏‎عومه‌ر گوڵپی له‌ ڕاگه‌یه‌نراوێكدا سه‌باره‌ت به‌ فرۆشتنی نه‌وت به‌ ته‌نكه‌ر بڵاویكرده‌وه‌، "‏‎به‌ پێی لێدوانی فه‌رمی كۆمه‌ڵه‌ی پیشه‌سازی نه‌وت، پارتی و یه‌كێتی و حكومه‌ته‌كه‌یان ڕۆژانه‌ 300 هه‌زار به‌رمیل نه‌وت ده‌فرۆشن، گریمان به‌رمیلێك ته‌نها 30 دۆلاریان بۆ ده‌كات له‌ كاتێكدا له‌ بازاڕه‌ جیهانییه‌كان نه‌وت به‌ 80 دۆلاره‌، ئه‌وه‌ داهاتی ئه‌و نه‌وته‌ی به‌ ته‌نكه‌ر و به‌شێكیشی به‌ پاڵاوگه‌ ده‌فرۆشرێت له‌ ڕۆژێكدا نۆ ملیۆن دۆلاره‌، له‌ مانگێكیشدا ده‌كاته‌ 270 ملیۆن دۆلار، واته‌ داهاتی مانگانه‌ی فرۆشتنی نه‌وت 405 ملیار دیناره‌".

ئاماژه‌ی به‌وه‌شكردوه‌، "‏‎هه‌مو ئه‌و ڕاستیه‌ ده‌زانین كه‌ به‌شێك له‌م ده‌ستهاته‌ بۆ تێچوی به‌رهه‌مهێنانه‌و ده‌درێته‌ كۆمپانیاكان، ئه‌ی ئه‌ویتری چی لێدێت؟ چه‌ندی ده‌بێته‌ داهات؟".

ده‌شڵێت، "‏‎ئه‌گه‌ر خه‌ڵكی كوردستان و خه‌زێنه‌ی گشتی پشكی له‌و نه‌وت فرۆشتنه‌ هه‌یه‌ بۆچی زانیارییه‌كان له‌ خه‌ڵك دەشاردرێنه‌وه‌؟ بۆچی وه‌زیری سامانه‌ سروشتییه‌كان به‌ وه‌كاله‌ت به‌ خه‌ڵكی كوردستان ناڵێت ئه‌م داهاته‌ چی لێدێت و بۆ كوێ ده‌چێت؟".