بەرپرسانی باڵای ئێران: ئاگربەست لە غەززە تاكە رێگایە بۆ ئەوەی ئێران هێرشی راستەوخۆ نەكاتە سەر ئیسرائیل
  2024-08-13       264       

ئاژانسی رۆیتەرز لەزاری سێ بەرپرسی باڵای ئێرانییەوە بڵاویكردۆتەوە كە گەیشتن بە رێككەوتن لەسەر ئاگربەست لە غەززە لە ئەنجامی گفتوگۆ چاوەڕوانكراوەكانی ئەم هەفتەیەدا، دەبێتە مایەی ئەوەی ئێران خۆی بەدوربگرێت لە هێرشی راستەوخۆ بۆ سەر ئیسرائیل لە تۆڵەی كوژرانی ئیسماعیل هەنیە، سەرۆكی مەكتەبی سیاسی بزوتنەوەی حەماس لە تاران.

ئاوێنە: یەكێك لەو بەرپرسە باڵا ئێرانییانە بە ئاژانسەكەی وتوە، لە ئەگەری شكستهێنانی دانوستانەكان بۆ راگرتنی جەنگ لە غەززە یان ئەوەی بۆیان دەربكەوێت كە ئیسرائیل كات دەكوژێت لە دانوستانەكاندا، ئەوا ئێران و بریكارەكانی لەوانە حزبوڵای لوبنانی، هێرشی راستەوخۆ دەكەنە سەر ئیسرائیل.

بەرپرسە باڵاكانی ئێران ئاماژەیان بەوە نەداوە كە ئێران چەندێك ماوە دەدات بە دانوستانەكان بۆ گەیشتن بە رێككەوتن لەبارەی ئاگربەست لە غەززە.

ئەو سێ بەرپرسە ئێرانییە ئاماژەیان بەوەداوە كە لەگەڵ زیادبونی مەترسی بەرفراوانی جەنگ لە رۆژهەڵاتی ناوەڕاست لەدوای كوژرانی ئیسماعیل هەنیە و فواد شوكر، فەرماندەی باڵای حزبوڵا، لەم رۆژانەی دواییدا ئێران دەستیكردوە بە گفتوگۆی چڕ لەگەڵ وڵاتانی ئەوروپاو ئەمریكا لەبارەی وەڵامی تاران بۆ ئیسرائیل.

هەروەها ئەمڕۆ سێشەممە، باڵیۆزی ئەمریكا لە توركیا رایگەیاند، واشنتۆن داوا لە هاوپەیمانەكانی دەكات هاوكار بن لە رازیكردنی ئێران بۆ هێوركردنەوەی گرژییەكان.

سێ سەرچاوەی حكومی لە ناوچەكە بە رۆیتەرزیان وتوە، گفتوگۆ لەگەڵ تاران هەیە بۆ دوركەوتنەوە لە زیاتركردنی گرژییەكان بەر لە دانوستانەكان لەبارەی ئاگربەست لە غەززە كە بڕیارە رۆژی پێنجشەممەی ئەم هەفتەیە لە میسر یان قەتەر بەڕێوەبچن.

 

زۆرترین بینراو
© 2025 Awene Online, Inc. All Rights Reserved.
×