وتەبێژی حووسییەكانی یەمەن ڕایگەیاند، بەڵێن دەدەین وەڵامی هێرشەكەی دوێنێی ئیسرائیل بدەینەوە، كە بەندەری حودەیدەی ڕۆژئاوای یەمەنی بۆردوومان كرد و بە هۆیەوە ٨٠ كەس بریندار بوون، دەشڵێت، ئامادەكاریی دەكەین بۆ شەڕێكی درێژخایەن لەگەڵ ئیسرائیل و وەڵامی هێرشەكان دەدەینەوە، چیتر تەلئەبیب پارێزراو نییە.
یەحیا سەریع، وتەبێژی سەربازی حووسییەكانی یەمەن لە بارەی وەڵامدانەوەی هێرشەكانی ئیسرائیل بۆ سەر وڵاتەكەیان، لە گرتەیەكی ڤیدیۆیدا بەمجۆرە دوا.
یەحیا سەریع ڕایگەیاند، وەڵامى كاریگەرمان بۆ هێرشە ئاسمانییەكانی ئیسرائیل بۆ سەر بەندەری حودەیدە دەبێت و درێغی ناكەین لە هێرشكردنە سەر ئامانجە گرنگەكان لە ئیسرائیل.
وتیشى، ئامادەكاریی دەكەین بۆ شەڕێكی درێژخایەن لەگەڵ ئیسرائیل و وەڵامی هێرشەكان دەدەینەوە و چیتر تەلئەبیب پارێزراو نییە.
ئاماژەی بەوەشكرد، فشارخستنە سەر یەمەن بۆ ئەوەی واز لە پشتیوانیی غەزە بهێنێت، خەونێكە و بەدی نایەت، هێرشی ئیسرائیل ئیرادەی ئێمە بۆ پشتیوانیی غەزە زیاتر دەكات.
هاوکات، سوپای ئیسرائیل بڵاوى کردەوە، دوێنێ چەند ئامانجێكی حووسییەكانیان لە پارێزگای حودەیدیە لە یەمەن بۆردومان كردووە، كە کۆگاى سوتەمەنى و وێستگەی كارەبا بوون.
جێگەى ئاماژەیە، دواى هێرشەکانى ئیسرائیل وەزارەتی تەندروستی یەمەنیش بڵاوی كردەوە، لە ئەنجامی هێرشی ئیسرائیل بۆ سەر حووسییەكان ٨٠ كەس بریندار بوون، كە برینی زۆرینەیان سەختە.