دەستەی گشتی حەج و عومرەی عێراق ڕایدەگەیەنێت، نیوەی حاجییان لە مەدینەن و نیوەكەی دیكەشیان دوای زیارەی پێغەمبەر (د.خ) چوونەتە مەككە.
حەسەن فەهد کەنانی، وتەبێژی دەستەی گشتی حەج و عومرە ڕایگەیاند، لە ڕێگەی فڕۆکەخانەکانی بەغدا، نەجەف، بەسرە، هەولێر، سلێمانی و کەرکوکەوە بەردەوامن لە بەڕێکردنی حاجیان بۆ فڕۆکەخانەی شازادە محەمەد بن عەبدولعەزیز لە شاری مەدینە، لە رێگەی وشکانیشەوە حاجیان لە دەروازەی عەرعەرەوە بۆ سعودیە بەڕێ دەکرێن.
وتیشی، “تا ئێستا 24 هەزار و 400 حاجی بە ڕێگەی ئاسمانی و وشکانیی گەیشتوونەتە سعودیە”.
ڕوونیشی كردەوە، ئێستا نیوەی ئەو حاجییانە لە شاری مەدینەن و نیوەکەی دیکەشیان دوای زیارەتی پێغەمبەری ئیسلام (د.خ) گواستراونەتەوە بۆ مەککە.