من زۆر ناچمە سەر باسی مەترسی  تایبەتییکردنی کەرتی گشتیی و کاریگەرییە خراپەکانی، چونکە  پێشتر ئەمەم لە وتارێکی تردا باسمکردووەو خەڵکیش ئەمڕۆ ئەو کاریگەرییە خراپانە بەچاوی خۆیان دەیبینن.  ئەوەی لەم وتارەدا مەبەستمە، ئەو مەترسییە گەورەیەیە  کەبەناوی  فرۆشتن یان بەشدارییکردنی کەرتی تایبەتە لەبواری دەرهێنان و گواستنەوەو فرۆشتنی سامانی نەوت و گازی هەرێمە، لەکاتێکدا ئەمە بە  سامانی نیشتمانیی ناودەبرێت.

بەداخەوە ئێستا بەشێکی زۆری کەرتە گرنگەکانی هەرێمی کوردستان دراون بە کەرتی تایبەتی، لە خۆراک و دەرمانەوە بیگرە بۆ خانووبەرە، کەرتی پەروەردە و خوێندنی ئەکادیمی، تەندروستیی، ئاو، کارەبا،  تەنانەت هاتووچۆش دراوە بە کەرتی تایبەت. لەمەدا نازانم ئەگەر حکومەتێک تەواوی خزمەتگوازرییەکانی دابێتە دەستی کەرتی تایبەت، ئیتر بوون و مانەوەی هەیکەلی دەوڵەت چ مانایەکی هەیە؟! ئەمڕۆ زۆربەی هاووڵاتییانی هەرێم  ئەم پرسیارە دەکەن، باشە ئەگەر حکومەتێک  هیچ شتێک پێشكەشی هاووڵاتیانی نەکات، ئیتر ئەمە مانای چ حکومەتێکە؟ هەندێک چاودێری سیاسیش پێیان وایە، هاووڵاتی تەنها لایەنە زبرو توندەکانی دەسەڵات دەبینێت.

لەهەمووشی ترسناکتر ماوەی چەند ساڵێکە  بەناوی " ئابووری نیشتمانیی و سەربەخۆ" وە، دەستکراوە بە دەرهێنان و فرۆشتنی سامانی سروشتی " نەوت، گاز" باس لە هەندێک سامانی تریش دەکرێت کە بە تەواوەتی لە چاوی خەڵک دوورخراونەتەوەو کەسیش نازانێت چۆن و بەکێ دەفرۆشرێن؟

کاتێک حکومەتی ناوەند بڕیارێک لەدژی هەناردەکردنی سامانی نەوت و گاز  دەردەکات، ئەمە بە سیاسەتێک لەدژی هەموو گەلی کورد دادەنرێت، بەڵام کاتێک باس لە فرۆشتنی دەکرێت و خەڵکی داوای زانیاریی  لەبارەی جۆری فرۆشتن و سەفقە نهێنییەکان دەکەن، حکومەت ئامادە نییە وەڵام بداتەوە.  لەلایەکی ترەوە ئەوەندەی من ئاگادارم، بەشێکی کاری پشكنین و دەرهێنان و گواستنەوە فرۆشتنیشی، دراوە بە چەند کۆمپانیایەکی  تایبەت بە کەسانی دەسەڵاتدار. ئیتر من وەکو هاووڵاتییەک، دەبێت تەنها بینەرێکی درامای پرۆسەی فرۆشتنی سامانی سروشتی بم، لەحاڵەتێکدا ئەمە ناوی سامانی نیشتمانی لێنراوە.

ئەو شێوازەی کە نەوت و گازی هەرێمی کوردستانی پێدەفرۆشرێت، لەناوچەکەدا وێنەی نییە تەنانەت لەعیراقیشدا، نەوت و گاز زۆر بە شەفافی دەفرۆشرێت و داهاتەکەی تەواو دیارە. لەکاتێکدا عیراق بە یەکێک لە دەوڵەتە گەندەڵ و نائارامەکانی جیهان دادەنرێت و هێشتا حکومەتی ناوەندەی بەهێزیشی نییە و کۆمەڵێک میلیشیا رۆڵی بەرچاویان لەژیانی سیاسیی و ئابوورییدا هەیە، بەڵام بۆ فرۆشتنی نەوت و گاز، بەوپەڕی شەفافییەتەوە ئەم پرۆسەیە دەکرێت.  ئەوەی لەهەرێمی کوردستاندا دەگوزەرێت، زیاتر لە مۆدێڵی وڵاتانی وەکو "کۆنگۆی دیموکرات و سۆماڵ دەچێت" کە هێشتا دەسەڵاتێکی دیموکرات و سیستمی پەرلەمانی بەهێزیان نییە و هەندیک میلیشیا دەستیان بەسەر کۆمەڵێك سەرچاوەی سروشتی گرتووەو نە حکومەت و نە پەرلەمانیش، ئاگاداری چۆنێتی فرۆشتنی ئەم سامانە نین، هەرچەندە ئێمە بەناو حکومەت و پەرلەمانمان هەیە، بەڵام  دەسەڵاتی لەم بوارەدا نییە.

هەرئەمەش وایکردووە کە بەشێکی زۆری هاووڵاتییانی هەرێمی کوردستان، هیچ دڵیان بەم سامانە خۆش نەبێت و بە سامانی خۆیانی دانەنێن، کاتێکیش دادگای باڵای عیراق بڕیارێکی لە دژی فرۆشتنی نەوت و گازی هەرێم دەرکرد، کاردانەوەی زۆر بەهێزی لای خەڵكی نەبوو، بگرە بەشێکی زۆری خەڵكی بەلایانەوە ئاساییە، چونکە هیچ کاتێک ئاگاداری چۆنێتی فرۆشتنی  ئەم سامانە نەبوون، بەشێکی کەمی قازانجی ئەم سامانە سروشتییەیان بەرکەوتووە. بگرە هەندێک چاودێری سیاسیش پێی وایە، باشترە سامانی نەوت و گازی هەرێمی کوردستان بخرێتەوە ژێر دەستی ناوەند، بەمشێوەیە سوودی زیاترە بۆ گەلی کورد، ئەگەر سوودیشی نەبێت، ئەوا خۆ زەرەری نییە، چونکە ئێمە لە جیاتی سوودمەند، فرۆشتنی نەوت قەرزارباری کردووین.

هیوادارین حکومەتی هەرێم چاوپیاخشاندنێکی ورد لەبارەی دۆسێی نەوت و گازەوە بکات، چونکە زۆرینەی هاووڵاتیانی هەرێم لەم دۆسێیە ناڕازین و بە سامانی خۆیانی دانانێن.