دوا وتاری مەلا بەختیار، سەبارەت بە هەڵكوتانی كۆماندۆ بۆسەر دەزگایەكی رۆژنامەنووسی و رووناكبیریی، ویژدانی هەموو خوێنەوارێك و هەموو ئەوانەی لە خەمی نیشتماندانو جوولاند.   هەرێمێك یاڵا یاڵا دەزگایەكی كولتووری پشت بەستن بە بنەمای فیكری و مەعریفی لێ دابمەزرێت و كاری جدی لەسەر كولتوورو بەرزكردنەوەی ئاستی نزمی خەڵك بكات، بۆئەوەی ئاسۆی بیرركردنەوەیان فراوانتر بكات، كەچی كۆماندۆ هێرش بكاتە سەر بنكەیەكی لەو شێوەیەو  داگیری بكات. ئەمە مانای ئەوەیە ئەوپەڕی بەربەرییەتە. بەربەرییەتە چونكە دەیانەوێت  چی  رۆشنبیری و وتەی جوان هەیە لەناویبەرن. هەر هەرێمێكیش رۆژنامەیەكی جوانی تێدا دەرنەچێت، دوو وشەی هەقی تێدا نەگوترێت، كار لەسەر ئینتیمای نیشتیمانی و پێكەوەیی نەكرێت، هەر وڵاتێك رەنگی عەسكەرتارییەتی تێدا پەخش و بڵاو كردەوەو، دەنگی هەقی سەرنگوم كرد، بێگومان لەو وڵاتە بەربەرییەت وەك كەپكەی مار خۆی گرمۆڵەدەكات و گەشە دەكات و ئیتر مانایەك بۆ ژیان بە سەرفرازی نامینێتەوە. ئێستا سلێمانی بەدۆخێكی ئاوەهادا دەڕوات، كە بەدرێژایی مێژووی سلێمانی بەهەموو حوكمڕانی پاشاو دیكتاتۆرەكانی رابردوو، شێوەی لەمجۆرەی بە خۆیەوە نەبینیوە. 

   باش لەبیرمە ساڵی 2007 – 2008 دەیانگوت سلێمانی پارێزگا بوو، كردیانەوە بە قەزا، من ئەوكات لەدیمانەیەكم لەگەڵ دانا ئەحمەد مەجید (ئەوكات پارێزگاری سلێمانی بوو) ئەو پرسیارەم لێكرد، كە خەریكە سلێمانی دەبێت بەقەزا. بەڵام ئەوەی ئێستا لەسلێمانی دەگوزەرێت، سلێمانی تەنیا نابێتەوە بە قەزا، بەڵكو دەبێتە ناوەندی بەربەرییەت لەم هەرێمەدا. بەربەرییەتێك كەس ناتوانێ ئیتر نووزەیەكی لێوە بێت كە باس لە دادو ماف بكات. كەم نین ئەو وڵاتانەی رووبەڕووی شەڕی جیهانی یان هەرێمی  یان شەڕی ناوەخۆ بوونەتەوە، بەڵام سەركردەكان نەیانهێشتووە، رۆژنامەكان دابخرێن.

  ئێستا خاڵی گرنگ ئەوەیە، سلێمانی بۆنی مەرگ و كۆماندۆی لێدێت، بۆنی بێ وەفایی و راونانی هاوڕێیانی دێرین و هاوڕێیانی خەبات و هاو سەنگەرانی لێدێت. بۆنی خوێن و نەهێشتنی دەنگی ئازادی و، پەلاماردانی هاوڕێكانیانە. بەردەوامبوونی ئەم دۆخە، هەر رۆژەو نۆرەی یەكێكی ئازاو دەنگهەڵبڕو تێكۆشەرە، كە  بیانەوێ ئازاری بدەن.

 ئازاری زۆر كەسیان داوە، زۆر كەسیشیان یەك لە دوای یەك  بە غەدر كوشت، بەڵام مەلا بەختیار لەگەڵ هەموویاندا جیاوازترە. وێڕای ئەو خەباتە نەپچڕاوەی لەشارو شاخ ، وێڕای  ئەو پاشخانە فیكرییەی كە شەوو رۆژی خستۆتە سەر یەك تا بتوانێت خزمەتێكی بچووكی كولتووری كوردی بكات، وێڕای ئەوەی بۆ سەر هیچ لایەك مەترسی نییە. كەچی ئێستا  دەبینین لەخراپترین دۆخدا دەژی، نەك بەدەست دوژمنانی دێرینی یەكێتی نیشتمانی، بەڵكو بەدەست  كەسانێك هاتوونەتە سەر حازری و، میزاجیان چۆن بێت وەها رەفتار دەكەن. سلێمانییان  شێواندو ئێستا كەس لە ژیان و ماڵی خۆیان دڵنیا نین. یەكێك تێبینییەكی هەبێت، ئیتر دڵی دەكەوێتە  ناودەستی، ئاخۆ كەی كۆماندۆ  پڕی دەدەنێ.

   ئێستا پرسیاری گەورە ئەوەیە، رۆشنبیرانی سلێمانی و تەنانەت تەواوی كوردستان، هەر ئاوا  لێی بێدەنگ دەبن؟!، ئاخر ئەمجارە لە هەموو جارەكانی دیكە جیاوازترە، چونكە ئەمجارە سووتاندنی فیكرو بەهاو ئازادی و ئەخلاقە، بۆیە جگە لە دەركردنی چەندین بەیاننامە، پێویستە لە تیڤییەكان گفتوگۆی جدی لەسەر ئەو بابەتە بكرێت. پێویستە رێپێوان  بۆ بەردەم سەرۆكایەتی هەرێم و سەرۆكایەتی ئەنجومەنی وەزیران و ئەنجومەنی دادوەری و داواكاری گشتی و هەروەها قۆنسول و دامەزراوەكانی دیكە بكرێت، كە سنوورێك بۆ ئەم بەربەرییەتە دابنرێت، ئاخر وڵاتی خنكاندووە.

مەلا بەختیار تاكە سەركردەی یەكێتی بووە، كە زۆرترین خزمەتی رۆشنبیری و فیكری و دیموكراسی و پێكەوە ژیانی كردووە، بۆیە پێویستە بەدەنگی بەرز داكۆكی لێبكەین و ، لەوە زیاتر نەهێڵین سووكایەتی پێ بكرێت.

رۆشنبیرانی كورد، ئێستا تۆپەكە كەوتۆتە گۆڕەپانی فراوانی ئێوە، فەرموون بزانین چی دەكەن...