كۆمەڵگای كوردی كۆمەڵگایەكە تا بڵێی ناهۆشیارە، كۆمەڵگایەكە كاتێ بیەوێ سێوێك لە دارێك بكاتەوە، مۆنتیسكیۆ گوتەنی دارەكە لە بنڕا دەبڕێتەوە. ئێستا سوپایەك سۆشیال میدیامان هەیە، هەمووی ژەهر دەخاتە  خوێنی خەڵكەوە، نەتەوەیەك بە نیشتمانەوە قوربانی هەوالێكی ورووژێنەر دەكات. لە هیچ كۆمەڵگایەكدا شتی لەمجۆرە نییە. ئەوەندەی ئامادەكاری بۆ دژایەتیكردنی یەكتری دەكەین، هەر ئاگامان لە دوژمنی سەرەكی و هەمیشەییمان نەماوە. میللەتێكین تا سەرئێسقان  ناهۆشیار و نا ئاگاین، نە پەروەردەمان هەیە، نە دەخوێنینەوە، نە بەرژەوەندی گشتی دەپارێزین. هەر دەڵێی لە ناو دارستانەكانی ئەمازۆن دەژین و كەسمان ئاگامان لە كەس نییە.  ئاخر تا مێژووی گەلانی دنیا نەخوێنینەوە، نازانین  چەند كڵۆڵین. گەلی ئەمریكا، ڤێتنام، چین،  سەنگافورە، توركیا، لەم دواییەش روانداییەكان ، چەند نموونەیەكی زیندوون كە توانیویانە بە شانازییەوە مێژووی خۆیان بنووسنەوە. تا ئێستا پەندێكمان لێیان وەرنەگرتووە!.

  با پاساو بۆ ئەوە نەهێنینەوە ئەم كۆمەڵگایە داگیركراوەو  چەوسێنراوەتەوە، ئەم قسەیە فلسێكی سووتاو ناهێنێت. ئێمە لە دوای رووخانی سۆمەرییەكانەوە، ئیتر تەفروتوناو كراوین و ئەقڵی رزگاری و ئازادیمان تێدا چەكەرەی نەكردووە، ئەوەی هەبووە سۆزو عاتیفەی رووت بووە. راستە مێژوویەكی خوێناویمان هەیە، بەڵام رزگاری و ئازادیمان وەك فیكرو فەلسەفە وەرنەگرتووە، بەڵكو بە دروشمبازی و بە هەڵچوون و داچوون  وەرگرتووە. كە راپەڕینیشمان كرد، بێ فیكرو فەلسەفە بوو، سیاسەتیش بەبێ فیكر ئەنجامەكەی هەر ئاوای لێدێت كە كەوتن لەدوای كەوتنە. یەك هەڵسانەوەی كورت سەد كەوتنی سەختی بەدواوەیە.  

   تۆ بڕوانە كورد وەك نەتەوەیەكی گەورە لەسەر ئەم زەوییە، تا ئێستا شوناسێكی سەردەمییانەی نییە، تەنانەت هەر لە چەمكی شوناس بە تێگەیشتنی ئەمڕۆ تێنەگەیشتووین. چونكە شوناس لەماوەی سەد(100) ساڵی رابردوودا گۆڕانكاری زۆری بەسەردا هاتووە، فەرموون لەسەردەمی دەستكردی زیرەك شوناسی ئێمەی كورد لە كوێدایە!.

    ئێمە لەماوەی سی و دوو ساڵی رابردوودا بە حساب ئازادین و بەشێكی باش لە خاكی داگیركراوی خۆمان كەوتۆتەوە دەست خۆمان، كەچی دوو كەسی تیۆریستمان بۆ دروست نەكرا، ئەدەب و هونەر بە هەموو لقەكانیانەوە(شیعر، چیرۆك، رەخنەی ئەدەبی ، مۆسیقا، گۆرانی ، هونەری شێوەكاری، شانۆ....هتد)، هەر هەموویان لە پاشەكشەیەكی خێرادان و كەوتوونەتە نێو قووڵترین قەیرانەوە. كام میللەت لەسەر ئەم زەوییە هەیە بەقەد كورد  شاعیر ببوورە ماعیرو نووسەر ببوورن نووسەرەوەی هەبێت، لەكام وڵاتی دنیا حیزبێك بە دروشمی شۆڕشگێڕانەو نیشتمانییانە خەڵكی كۆكردۆتەوەو، دواییش كە دەنگی پێ هێناوە، سەدو هەشتا پلە بایداوەتەوەو هەڵگەڕاوەتەوەو پشتی لە هەموو دەنگدەرەكەی خۆی كردووەو بە خەڵكەكەی خۆی پێكەنیوە. كورد راستی گوتووە رێوی لە كونی خۆی هەڵگەڕێتەوە گەڕ دەبێت، ئەو حیزبانەش كە لە بەرنامەكانیان هەڵگەڕاونەتەوە  ببینن چۆن گەڕ و گڕوو بوونە. بەداخەوە هەموو جومگەكانی ئەم كۆمەڵگایە لەباریەك هەڵوەشاونەتەوە. تەنیا ئەوانەی لە پەراوێزدا دەژین و دەستیان بە هیچ رانەگەیشتووە، باسی ئازادی و نیشتمانپەروەری و بنەبڕكردنی گەندەڵی دەكەن، بەڵام كاتێك دەستیان دەگاتە كێكەكە، بەتەواوی خۆیان قێزەون دەكەن، دەبێت هەزار خۆزگە بە كفن دز بخوازیت.

   مێژووی خۆمان بەو مەعریفەیەی هەشمانە، پێماندەڵێت، سەد جاری دیكەش راپەڕین بكەین و داوای نان و ئازادی بكەین، سەد حیزبی دیكەی وەك گۆڕان دروستبێتەوەو دروشمی شۆڕشگێڕانە بڵێتەوە، ئەنجامەكەی پووچ دەبێتەوە، چونكە ئەقڵییەتەكە نەگۆڕاوە. پەروەردەمان نەگۆڕاوە. كە ئەقڵییەت و پەروەردەش نەگۆڕا، ئیتر هەموو ئەوانی دیكە گۆڕانكارییان بەسەردا نایەت و سیناریۆكان دووبارەو سەدبارە دەبنەوە.

ئەو پەل كوتان و مەلەكردنەی ئێمە دەیكەین، لەناو زۆنگاودایە، هەرجۆرە مەلەیەكیش لەناو زۆنگاودا بكرێت دادمان نادات، تاكە چارەسەر ئەوەیە زۆنگاوەكە بگۆڕین و تاڤگەیەك بڕژێنینە ناوی تا زۆنگاوەكە دەكرێتە ئاوێكی سازگارو روون. ئەمەش بە بەرنامەو پلانێكی تۆكمەو دوورمەودا دەكرێت، كە ئەقڵێكی نوێ هەڵیبسووڕێنێت. ئەم ئەقڵە نوێیەش تا ئێستا غائیبە .