سەرکردەکانی تورک و فارس سیاسەتزانن و، بەپێچەوانەی ئەوانەی کوردەوە، بۆ ئەم گۆڕانکاریانەی ناوچەکە دەگرێتەوە، پیلانی ئامادەکراویان هەیە. ئامانجیشیان ئەوەیە: هەژمونی ئیمپریالیستانەی تورک و فارس وەک خۆی بمێنێتەوەو، بەتایبەت هەردو بەشی گەورەی کوردستان، کە باکور و خۆرهەڵاتن، لە ژێر هەژمونی ئیمپریالیستانەیان دا بمێنێتەوە.
بۆ ئەم مەبەستەش، سەرکردەکانی تورک و فارس پیلانێکیان ئامادەکردوە، بۆ لەخشتەبردنی کورد. بۆ ئەوەی کورد دەرفەتی ئەم گۆڕانکاریانە نەقۆزێتەوە، هەڵساون پرۆژەی پێدانی دەسەڵاتی "پارێزگارەکان" لە داهاتودا بە کورد دەدەن بە ناوی چارەسەرکردنی پرسی کوردەوە.
هەر سەرکردەیەکی کورد، بەبێ دیاریکردنی [جوگرافیا]ی باکور یا خۆرهەڵاتی کوردستان، بکەوێتە دوای تورک و فارسەوە، لەخشتەدەبرێ. چونکە دوای ئەوەی گۆڕاکارییەکان لە ناوچەکەدا دامرکانەوە، دیسانەوە تورک و فارس دەسەڵاتی "پارێزگاکان"یش لە کورد وەردەگرنەوە. چونکە هەمیشە لە گۆڕانکارییەکان دا، تورک و فارس ئامادەبون کەمێک سازش بۆ کورد بکەن بۆ لەخشتەبردنیان. زۆر نمونەش لە مێژومان لەسەر ئەم ڕاستییە هەیە.
کلیلی چارەسەرکردنی پرسی کورد لە تورکیا، ئەوەیە: دەوڵەتی تورک دان بنێت بە [جوگرافیای باکوری کوردستان] و، مافی خودموختاریی و خۆسەری، یا فیدراڵیی، یان ئۆتۆنۆمیی، پێ بدات.
بە هەمان شێوەش، کلیلی چارەسەرکردنی پرسی کورد لە ئێران، ئەوەیە: دەوڵەتی فارس دان بنێت بە [جوگرافیای خۆرهەڵاتی کوردستان] و، مافی خودموختاریی و خۆسەری، یا فیدراڵیی، یان ئۆتۆنۆمیی، پێ بدات.
هەڕاجکردنی پرسی کورد، لە ژێر ناوی "برایەتیی گەلان"، جا بە ناوی برایەتیی نێوان تورک و کورد، یا فارس و کورد، یا عەرەب و کورد، بە بێ گەرەنتیکردنی پێدانی مافی خودموختاریی و خۆسەری، یا فیدراڵیی، یان ئۆتۆنۆمیی و، دیاریکردنی جوگرافیای ناوچە خۆسەرەکە یا فیدراڵەکە، دەچێتە خانەی فرۆشتنی خاک و نەتەوەی کوردەوەو، لە بنەڕەتییش دا: ئابڕوبردنی بزوتنەوەی ناسیۆنالیستیی کوردییە.
ئینجا توانج لە فیدراڵیی باشوری کوردستان دەدرێ، گوایە هیچ نییە. بابە؛ پارتیی و یەکێتیی هەمو شتێکن لە باشوری کوردستان. خۆیان لە حوکمڕانیی دا؛ گەندەڵن. ئەگینا وەک قەوارە: باشوری کوردستان قەوارەیەکی نێودەوڵەتیی دانپێدانراوەو، لە زۆر پرسیش دا وەک دەوڵەت مامەڵە دەکات. نوێنەرایەتیی هەیە، بە گوندەیی نەوت دەفرۆشن و گومرگ دەسەپێنن، سەرۆکی وڵاتان دێنە لایان و، هەمو شتێک به زمانی کوردییە. مەسەلەکە ڕەخنەیە لە حوکمڕانیی پارتیی و یەکێتیی، نەک لە قەوارەکە. ئەگینا لە ڕوی قەوارەوە لە ئاستی کۆنفیدراڵیی دایە. کاتکوشتنیش بە قازانجی پارتیی و یەکێتیی نییە. بەتایبەت ئەگەر پێشمەرگە یەک نەخەن و، دەسەڵات ڕادیکاڵانە چاکسازیی نەکات؛ گۆڕانکارییەکان بە قازانجی پارتیی و یەکێتیی نییە. خۆ هێندەش نێشتیمانپەروەر نین کە لەم گۆڕانکاریانەدا خۆیان بۆڕزگارکردنی کەرکوک، خانەقین و موسڵی کوردستان ئامادە کردبێ!
پرسیاری بنەڕەتی ئەوەیە: "[برایەتیی]" واتای چی دەگەیەنێت، ئەگەر مافە نەتەوەییەکانی کورد بە شێوەیەکی یاسایی و دەستوری دیاری نەکرێ و سنوری ناوچە کوردستانییەکان لە دەستورەکەدا جێ نەکرێتەوە؟ کەوابو، ئەم "برایەتی"یە چییە؟
ئێ خۆ ئەتاتورک، خومەینیی، سەددام، ئەسەد، ئەردۆگان و خامنەیی، هەر هەمویان وتویانە: تورک و کورد بران. یا فارس و کورد بران. یان عەرەب و کورد بران!
پرسی کورد نە نوێژکردنە، نە برایەتییە، نە مارکسییە و، نە دڵدارییە. بەڵکو پرسی کورد: کێشەیەکی نەتەوەییە، پەیوەستە بە داگیرکاریی ئیمپریالیستانەی تورک، فارس و عەرەب بەسەر خاکی کوردستانەوە.
با لەم بابەتەشمدا جارێکی تر جەخت لەسەر پەیامەکەی ئۆجەلان بکەمەوە!
پەکەکە دەیان هەزار خوێنگەرمی باکور، باشور، خۆرهەڵات و خۆراوای کوردستانی بە شەهیدکردن دا، بە ئامانجی: "سەربەخۆیی کوردستان".
ئەوکات کە دەوترا، لە ڕوی سیاسەتی ئیقلیمیی و نێودەوڵەتییەوە لە قۆناغی یەکەم دا سەربەخۆیی ئەستەمەو، سەرەتا دەبێت فیدراڵیی یا ئۆتۆنۆمیی بەدەستبهێنرێت؛ دنیایەک تەشهیر دەکرا.
ئێستا کە پەکەکە دەڵێن: فیدراڵیی و ئۆتۆنۆمیشمان ناوێ و، تەنیا "برایەتیی گەلان"مان دەوێ؛ جگە لە خۆم، وتاری یەک نوسەر و سەرکردەی کورد نابینم، ڕەخنەیان لێبگرێ و بڵێ: ئایا خوێنی لاوانی کورد تاڵانیی و هەڕاجیی بو؟
ئا ئەمانەن نوسەران و سەرکردەکانی کورد؛ کەسانی پۆپۆلیست و ماستاوچیین و، پیاهەڵدان بە پەیامەکەی ئۆجەلان دەنوسن. بەڵام گەر سبەینێ تورکیا ئۆجەلانی بەکارهێنا؛ ئەوکات هەر ئەم نوسەر و سیاسەتبازانە شەرم ناکەن و زمانیان سەد بست دەکەنەوەو، هێندە کاسەلێسن دان نانێن بە هەڵەو پیاهەڵدانەکانیان.
دیسانەوە دەپرسمەوە: گەر مافە نەتەوەییەکانی کورد لەچوارچێوەی "سەربەخۆیی، یا فیدراڵیی، یان ئۆتۆنۆمیی" نەبێ، چۆن بە دەستەواژەی "برایەتیی گەلان" گەرەنتی دەکرێ. لەکاتێکا هەر ئەردۆگانە کە "قیوم" بۆ ئەو سەرۆک شارەوانیانە دادەنێ کە کوردن و، تەنیا لە پارتەکەی ئەو نین. هەر ئەویشە کە هێرش دەکاتە سەر خۆراوای کوردستان.
دەی باشە: گەر دان نەنێن بە "فیدراڵیی یا ئۆتۆنۆمیی"، بۆ "[جوگرافیا]ی باکوری کوردستان"، کەوابو گەرەنتی چییە پاش بەکارهێنانی ئۆجەلان، ئەردۆگان لەسەر هەمان سیاسەتی خۆی بەردەوام نابێ؟
خۆ هەر ئەردۆگان بو سەرەتا ڕێگای بە گێڕانی جەژنی نەورۆز دا هەتا هەمو کوردە نەتەوەییەکانی دەستنیشان کرد. پاشان هەزار-هەزار لێی گرتن و لێی شەهید کردن.
گەر ئەردۆگان بە فەرمی دان بە مافە نەتەوەییەکانی کورد لە باکوری کوردستان نەنێ و، لە دەستوری تورکیا نەچەسپێنرێ و، [جوگرافیا]ی باکوری کوردستان لە دەستوری تورکیا دانی پێدا نەنرێ، هەروەک چۆن جوگرافیای ئیرلەندای باکور لە شانشینی یەکگرتوی بەریتانیا دانی پێدا نراوە، ئەوا ئامانجی ئەردۆگان ئەوەیە کە ئۆجەلان بەکاربێنێ و، بۆیە لەم تەوقیتەش دا ئەردۆگان ئەوە دەکات ئەوە پیلانێکە بۆ لەتکردنی پەکەکەو، لەتکردنی کوردانی باکور و، هەروەها لەتکردنی کوردانی خۆراوا!
هەر هیچ نەبێ، ئەگەر ئەردۆگان تۆزقاڵیک نیەتی پاکە لە چارەسەرکردنی پرسی کورد، با لە ئێستادا دان بنێت بە: "خۆسەری خۆراوای کوردستان". بەوە نەک هەر کوردانی باکور، بگرە کوردانی خۆراوا، باشور و خۆرهەڵاتییش کەمێک ئاشت دەکاتەوە.
لە کۆتاییدا، لە سەرکردەکانی پەکەکە دەپرسم: بۆچیی و لە پێناو چی دا ئەم دەیان هەزار لاوانەی کورد بە شەهیدکردن دران؛ ئایا خوێنی لاوانی کورد هەڕاجیی و تاڵانییە؟