وه‌فدی عێراق و وه‌فدی سوریا به سه‌رۆكایه‌تی عه‌لی، زه‌یدی سه‌رۆك وه‌زیرانی عێراق و ئه‌حمه‌د شه‌رع، سه‌رۆكی راگوزه‌ری سوریا كۆبونه‌وه‌و تاوتوێی چه‌ند پرسێكیان كرد له‌نێویشیاندا هه‌نارده‌ی نه‌وتی عێراق له‌ڕێگه‌ی به‌نده‌ری بانیاسی سوریاوه به قه‌باره‌ی دو ملیۆن به‌رمیلی رۆژانه.
ئاوێنه: به‌پێی راگه‌یه‌ندراوێكی نوسینگه‌كه‌ی، ئەمڕۆ چوارشەممە لە دیمەشق، عه‌لی زه‌یدی، سەرۆک وەزیرانی عێراق له‌گه‌ڵ ئه‌حمه‌د شه‌رع، سه‌رۆكی راگوزه‌ری سوریا، سەرۆکایەتی کۆبونەوەی گفتوگۆی فراوانه‌كانی نێوان شاندی هەردو وڵاتیان کردوه.
له كۆبونه‌وه‌كه‌دا زه‌یدی جەختی کردۆتەوە کە هەردو گەلی عێراق و سوریا، یەک گەلن لە دو وڵاتدا، هەروەها ئاماژەی بە کارکردن کرد بۆ گەشەپێدانی شه‌راكه‌ت و هاوکاریی هاوبه‌ش لە بواری جیاوازدا، بەتایبەتی له بواریی ئابوری و کۆمەڵایەتی، لەگەڵ بەهێزکردنی هاوکاریی ئه‌منی و یەکخستنی هەڵوێستەکان بەرامبەر پرسە هەرێمی و نێودەوڵەتییەکان و کارکردن بۆ بەدیهێنانی ئاشتی و سەقامگیری لە ناوچەکەدا.
به‌پێی راگه‌یه‌ندراوه‌كه لای خۆیشییه‌وه ئه‌حمه‌د شه‌رع پێزانینی زۆری خۆی بۆ سه‌ردانه‌كه‌ی زه‌یدی و شاندی یاوەری دەربڕی و جەختی لە قووڵیی پەیوەندییە دوقۆڵییەکان و پەرۆشیی سوریا کردەوە بۆ بەدیهێنانی بەرزترین ئاستی هاوکاری لەنێوان هەردو وڵاتدا.
وه‌ك له راگه‌یه‌ندراوه‌كه‌دا هاتوه، لە کۆبونەوەکەدا تاوتوێی چەندین پرس کرا، لەوانە هەناردەکردنی نەوتی عێراق لە ڕێگەی هێڵی بانیاس بە قه‌باره‌ی دو ملیۆن بەرمیل لە ڕۆژێکدا و زیادکردنی قەبارەی ئاڵوگۆڕی بازرگانی و هەروەها کارکردنی هاوبه‌ش بۆ گەشەپێدانی کەرتی کشتوکاڵ بۆ بەدیهێنانی ته‌واوکاریی خۆراکی و ئابوری.