وتەبێژی تیمی پارێزەرانی لاهور شێخ جەنگی رایگەیاند، داوایانکردووە دادگاییکردنی لاهور شێخ جەنگی و گیراوانی دیکەی لالەزار دوابخرێت کە لەسەر ماددەی ٤٠٦ بوو بڕیاربوو بەڕێوە بچێت.
ئاوێنە: دانا تەقیەدین، وتەبێژی تیمی پارێزەرانی لاهور شێخ جەنگی لە لێدوانێکدا وتی "لاهوری شێخ جەنگی و گیراوانی دیکە نەهێنرابوونە نێو دادگا و بڕیاردرا دانیشتنەکە دوابخرێت. ئەمڕۆ وادەیەکی نوێی دادگاییکردن دیاری دەکرێت".
دەربارەی هۆکارەکەش، ناوبراو دەڵێت "هۆکاری دواخستنی دادگاییەکە بۆ چەند هۆکاریک دەگەڕێتەوە، لەوانە پەڕاوەکە ٩٨٩ لاپەڕەیە و تیمی پارێزەران بەتەواوەتی نەیانخوێندووەتەوە؛ هەروەها داوایان کردووە ئەو ڕاگیراوانە لە گرتن و گواستنەوە بن، نەوەک زیندانیی ئاسایش، تاوەکوو ئێستاش وەڵاممان نەدراوەتەوە".
وتیشی "لە کۆی ٢٢ کەس کە بەپێی ماددەی ٤٠٦ ڕاگیراون، ٢٠ کەسیان لە زیندانیی ئاسایش ماون، بەپێی وتەی کەسوکاریان تەندروستی و دۆخی دەروونیی بەشێکیان جێگیر نییە".
جێی باسە، ماددەی ٤٠٦ لە یاسای سزادانی عێراقیدا، پەیوەستە بە تاوانی کوشتنی بەئەنقەست و گیراوانی لالەزار بەم ماددەیە دادگایی دەکرێن.