لە چالاكییەكی ئەمنیدا بۆ ڕووبەڕووبوونەوەی تاوانە ئەلیكترۆنییەكان، پۆلیسی گەرمیان تۆڕێكی مەترسیداری هەڵخەڵەتاندن و هەڕەشەكردنی لە شارۆچكەی كەلار ئاشكراكرد و دوو تۆمەتباری دەستگیركرد.

ئاوێنە: عەقید سۆران محەمەد، وتەبێژی بەڕێوەبەرایەتی پۆلیسی گەرمیان لە ڕاگەیەندراوێكدا وردەكاریی خستەڕوو و ڕایگەیاند "بەشی نەهێشتنی تاوانی گەرمیان توانیویانە دوو تۆمەتبار لە كەلار دەستگیر بكەن. یەكێك لەو تۆمەتبارانە، بەدانانی هەژمارێكی ساختەی فەیسبووك و بەناوی ژنێكەوە، چەندین هاوڵاتیی خستبووە ناو تەڵەی خۆیەوە و داوای پارەی لێكردوون لە بەرامبەر بڵاونەكردنەوەی وێنە و ڤیدیۆكانیان".

وتیشی "یەكێك لە تۆمەتبارەكان لەڕێگەی هەژمارێكی ساختەی فەیسبووكەوە بە ناوی (بێخاڵ جەمال) خۆی وەك ژن ناساندووە و پاش تێوەگلاندنی پیاوان لە داوەكەیدا، لەڕێگەی گرتە ڤیدیۆیی و وێنەكانیانەوە هەڕەشەی لێكردوون و لەبەرامبەر بڵاونەكردنەوەیاندا پارەی لە چەندین كەس سەندووە. ئێستاش تۆمەتبار لەبەردەم دادوەری لێكۆڵینەوەكاندا دانی بە تاوانەكەیدا ناوە".

هاوكات، نوسینگەی تاوانە ئەلیكترۆنییەكانی پۆلیسی نەهێشتنی تاوان، تۆمەتبارێكی تری بەپێی مادەی (420) لە یاسای سزادانی عیراقی دەستگیركردووە كە دانیشتووی شارۆچكەی هەریر بووە و فەرمانی دەستگیركردنی هەبووە.

لە كۆتایی ڕاگەیەندراوەكەدا، پۆلیسی گەرمیان بانگەوازێكی ئاراستەی هاوڵاتییان كرد و داوای لێكردن، هەركەسێك لەلایەن ئەو هەژمارە فەیسبووكەوە هەڵخەڵەتێنراوە، بۆ تۆماركردنی سكاڵای یاسایی سەردانی بەشی پۆلیسی نەهێشتنی تاوانی گەرمیان بكات.