ئەمڕۆ چوارشەممە، عەلی فالح ئەلزەیدی، سەرۆکوەزیرانی عێراق بە سەردانێکی فەرمی گەیشتە ڕیازی پایتەختی شانشینی عەرەبی سعودیە، ئەمەش وەک دەستپێکی گەشتێکی دیپلۆماسی بۆ وڵاتانی کەنداو.
ئاوێنە: نووسینگەی ڕاگەیاندنی سەرۆکوەزیرانی عێراق لە ڕاگەیەندراوێکی کورتدا، گەیشتنی ئەلزەیدی بۆ ڕیاز پشتڕاستکردەوە، بەڵام هیچ وردەکارییەکی دیکەی سەبارەت بە خشتەی کارەکان و ئەو دۆسیانەی بڕیارە لەو سەردانەدا تاوتوێ بکرێن، ئاشکرا نەکردووە.
ئەم سەردانەی ئەلزەیدی بەشێکە لە گەشتێکی فراوانتری بۆ ناوچەی کەنداو کە وڵاتی کوەیتیش دەگرێتەوە، و بە یەکەم گەشتی فەرمی ناوبراو بۆ ئەو ناوچەیە دادەنرێت لەوەتەی پۆستی سەرۆکایەتی حکومەتی وەرگرتووە. بڕیاریشە لە میانی دیدار و کۆبوونەوەکاندا، کۆمەڵێک دۆسیەی گرنگی سیاسی، ئەمنی و ئابووری گفتوگۆیان لەسەر بکرێت، بەتایبەت کە ئەم سەردانە هاوکاتە لەگەڵ هەڵکشانی گرژییە هەرێمییەکان، بەردەوامیی جەنگ و لێکەوتە ڕاستەوخۆکانی لەسەر عێراق و تەواوی وڵاتانی ناوچەکە.
ئەم گەشتە چاوەڕوانکراوەی کەنداو بایەخێکی تایبەتی هەیە، بەوپێیەی چەندین دۆسیەی هاوبەشی ستراتیژی لە نێوان عێراق و وڵاتانی کەنداودا هەن؛ کە لە پرسەکانی ئاسایش و وزەوە دەستپێدەکەن تا دەگاتە کەرتی بازرگانی و وەبەرهێنان. هاوکات، ئەو ئاڵنگارییانەی کە جەنگ بەسەر سەقامگیریی ناوچەکە و ئابوورییەکەیدا سەپاندوویەتی، وا دەخوازێت هەماهەنگیی سیاسی، ئەمنی و ئابووری لە نێوان وڵاتانی ناوچەکەدا لە ئاستێکی باڵادا بێت.