لە کاتێکدا واشنتن باس لە لاوازبوونی توانای سەربازی و ئابووری تاران دەکات، بەڵام هەڕەشەی فڕۆکە بێفڕۆکەوانەکان (درۆن) و تاکتیکە نائاساییەکانی ئێران، هێزەکانی ئەمریکای ناچار کردووە لەو ناوچانە دووربکەونەوە کە پێشتر هێمای هەژموونیان بوون. دووبارە جێگیرکردنەوەی فڕۆکە بۆمبهاوێژەکانی ئەمریکا لە بەریتانیا و کشاندنەوەی بەشێک لە هێزەکانیان لە ڕۆژهەڵاتی ناوەڕاست، تێچوویەکی گەورەی لۆجستی و ستراتیژی بەسەر ئەمریکادا سەپاندووە.
ئاوێنە: بەپێی ڕاپۆرتێکی ڕۆژنامەی نیویۆرک تایمز، بڕیاری ڕۆژانی ڕابردووی واشنتن بۆ کشاندنەوەی ١٢ فڕۆکەی بۆمبهاوێژی جۆری "B-1" لە بنکەی ئاسمانیی فێرفۆرد لە بەریتانیا، تەنها جێگۆڕکێیەکی ڕۆتینی نەبووە وەک ئەوەی دۆناڵد ترەمپ، سەرۆکی ئەمریکا، هەوڵیدا نیشانی بدات. بەڵکو ئەم هەنگاوە لەسەر بنەمای زانیاریی هەواڵگریی "ورد و متمانەپێکراو" بووە سەبارەت بە پلانی هێرشکردنە سەر فڕۆکە و سەربازە ئەمریکییەکان لە ڕێگەی درۆنەوە لە دەوروبەری بنکەکە. ڕۆژنامەکە ئاماژە بەوە دەکات کە ئەم بڕیارە بەشێکە لە زنجیرەیەک گۆڕانکاری و پاشەکشەی تیکتیکی کە واشنتن ناچار بووە ئەنجامی بدات لە دوای دەستپێکردنی جەنگ دژی ئێران لە ٢٨ی شوباتی ڕابردوودا.
لە ڕاپۆرتەکەدا هاتووە کە ئەو جەنگەی ترەمپ دەیویست وەک نمایشی هێز بەکاری بهێنێت، لە بری بەهێزکردنی پێگەی ئەمریکا، بووەتە هۆی سنووردارکردنی تواناکانی. بەشێک لە هێزە ئەمریکییەکان لە بنکەکانی ڕۆژهەڵاتی ناوەڕاست کشێندراونەتەوە دوای ئەوەی بنکەکانیان زیانی گەورەیان بەرکەوت، وە وەزارەتی بەرگریی ئەمریکا (پێنتاگۆن) ئێستا دوودڵە لە دووبارە بونیادنانەوەیان.
گۆڕانکاری لە نەخشەی هێز و تێچووی لۆجستی
لە ئێستادا واشنتن وەک جاران ناتوانێت گەرەنتیی ئاسایشی کەشتیوانی لە گەرووی هورمز و بەشێک لە دەریای سووردا بکات، کە بۆ چەندین دەیە پاساوی سەرەکیی بوونی سەربازیی ئەمریکا بوون لە ناوچەکە. ئەم جێگۆڕکێیە بەو واتایە دێت کە بۆمبهاوێژەکانی ئەمریکا بۆ ئەنجامدانی هەر هێرشێکی نوێ، پێویستە لە خاکی ئەمریکاوە بفڕن، کە ئەمەش پێویستی بە بڕینی مەودایەکی زیاتر و تێچووی زۆرتری سووتەمەنی هەیە. هاوکات، کەشتییە فڕۆکەهەڵگرەکانی ناو دەریای عەرەب دەبێت پشتیان بە بنکەی "دیێگۆ گارسیا" ببەستن کە نزیکەی ٢٢٠٠ میل لە کەنداوەوە دوورە، ئەمەش هەفتەیەک کات و تێچوویەکی زەبەلاح دەخاتە سەر ئۆپەراسیۆنەکان.
تاکتیکەکانی ئێران لە دەرەوەی هاوکێشە تەقلیدییەکان
لەلایەکی دیکەوە، ڕۆژنامەی واشنتن پۆست تیشک دەخاتە سەر لایەنێکی دیکەی جەنگەکە؛ سەرەڕای باڵادەستیی ڕەهای سەربازیی ئەمریکا و ئیسرائیل، ئێران توانیویەتی لە ڕێگەی درۆن، هەڕەشەی ئەلیکترۆنی (سایبەر) و ئۆپەراسیۆنی ناڕاستەوخۆوە، نەیارەکەی لە دۆخی ئامادەباشیی بەردەوامدا بهێڵێتەوە.
ڕۆژنامەکە باس لەوە دەکات کە ئێران لە ماوەی یەک هەفتەدا لە گەرووی هورمز هێرشی کردووەتە سەر زیاتر لە ١٠ کەشتی بۆ دروستکردنی کاریگەری لەسەر بازاڕی وزە، هەروەها درۆنی بەکارهێناوە بۆ لێدانی بنکە ئەمریکییەکان و کوشتنی سەربازان، جگە لە بەکارهێنانی حوسییەکان بۆ بەئامانجگرتنی پێگەکان لە سعودیە. شارەزایان پێیان وایە کە تاران دەستکەوتی مەعنەوی و تاکتیکیی بەرچاوی بەدەستهێناوە، ئەگەرچی توانای دەریایی و ئاسمانییەکەی وێران کراوە و سەرکردایەتییە باڵاکەی کوژراون. ئەمەش گۆڕانکاری لە سروشتی جەنگدا دەردەخات: هەبوونی چەکی کەمتر پێشکەوتوو ڕێگر نییە لە دروستکردنی پشێوییەکی گەورە، ئەگەر لایەنەکە بتوانێت خاڵە لاوازەکانی بنکە سەربازییەکان و هێڵەکانی دابینکردن بپێکێت.
پەیامێک لە دەرەوەی سنوورەکانی بەریتانیا
کشاندنەوەی فڕۆکە بۆمبهاوێژەکان لە بنکەی فێرفۆرد – کە مێژوویەکی دێرینی هەیە لە هاریکاریی سەربازیی نێوان ئەمریکا و بەریتانیا لە دوای جەنگی جیهانی دووەمەوە – نموونەیەکی دیاری ئەم دۆخەیە. بەپێی واشنتن پۆست، دوای دەستگیرکردنی پێنج کەس لە نزیک بنکەکە، مەترسیی هێرشکردن زیاتر بوو. بەڵام پۆلیسی بەریتانیا هیچ درۆن یان تەقەمەنییەکی لە بارهەڵگرەکانیاندا نەدۆزیەوە، بەڵکو تەنیا دەبەی سووتەمەنییان پێبووە و دواتر بە کەفالەت ئازاد کراون. نەبوونی هیچ هەڕەشەیەکی سەلمێنراو لەلایەن دەسەڵاتدارانی بەریتانیاوە، پرسیاری لەسەر قەبارەی ئەو مەترسییە دروستکردووە کە زانیارییە هەواڵگرییەکانی ئەمریکا پشتیان پێ بەستبوو.
سەرەڕای ئەوەش، چاودێران پێیان وایە کە تەنیا ناچارکردنی واشنتن بۆ گواستنەوەی فڕۆکەکانی، دەستکەوتێکی دەروونییە بۆ تاران. شیکەرەوە ئەمریکییەکان هۆشداری دەدەن کە ڕەنگە ئێران ئەو وانەیە فێر بووبێت کە دروستکردنی فشار لەسەر بنکەکان دەتوانێت واشنتن ناچار بە کشانەوە بکات. لێرەدا پارادۆکسی سەرەکیی جەنگەکە دەردەکەوێت؛ لە کاتێکدا ترەمپ بەردەوام ڕایدەگەیەنێت کە ئێران "داڕماوە" و خۆی ڕادەست دەکات، بەڵام تاران – سەرەڕای زیانە گەورەکانی – توانیویەتی باڵادەستیی سەربازیی ئەمریکا بگۆڕێت بۆ شەڕێکی ماوەدرێژ (شەڕی مانەوە). پێدەچێت ئێستا واشنتن ناچار بێت بنکەی سەربازی لە ناوچەی دوورتر بونیاد بنێتەوە و پێداچوونەوە بە جێگیرکردنی هێزەکانیدا بکات لە ڕۆژهەڵاتی ناوەڕاست، کە ئەمەش ڕەنگە تێچووەکەی بگاتە دەیان ملیار دۆلار.