پارتی دەم پارتی لە سۆشیال میدیا بڵاویکردەوە، "ئەحمەد تورک، سەرۆکی گەورە شارەوانی ماردین، قۆناغی وەرگرتنی چارەسەری کیمیایی بەسەرکەوتووی بەڕێکرد، ئێستا ماوەی چارەسەری تیشک دەستی پێکردووە. لە دڵەوە بڕوامان بەوە هەیە کە دەگەڕێتەوە ناومان و درێژە بە کارەکانی بۆ پڕۆسەی ئاشتی دەدات".

ئاوێنە: هەفتەی ڕابردوو، ئەحمەد تورک، ئەندامی شاندی دەم پارتی بۆ ئیمرالی تەندروستی تێکچوو و بەپەلە گەیێنرایە نەخۆشخانە. لەوکاتەدا وا بڵاوکرایەوە کە چارەسەری ڕۆتینی وەردەگرێت، بەڵام دواتر زانرا تورک ماوەی سێ مانگە تووشی شێرپەنجەی سییەکان بووە، لە ئەنقەرە چارەسەری بۆ دەکرێت. 

ئەحمەد تورک، لە هەڵبژاردنەوەکانی 31ی ئاداری 2024، سەرۆکی گەورە شارەوانی ماردین بوو، بەڵام دواتر لە پۆستەکەی دوورخرایەوە و قەیووم لە شوێنەکە دانرا، لە هەمان کاتدا ئەندامی شاندی دەم پارتییە بۆ ئیمڕالی، تەنیا لە سەردانەکانی سەرەتا لەگەڵیان بوو، دواتر بەهۆی تێکچوونی دۆخی تەندروستی نەیتوانی بەردەوام بێت. هاوکات ئەحمەد تورک لە 27ی شووبات دەقی بانگەوازەکەی عەبدوڵڵا ئۆجەلانی بۆ پرۆسەی ئاشتی بە کوردی خوێندەوە.