وتەبێژی پارتی رایگەیاند، زۆربەی بابەتەكانی گفتوگۆی نێوان لیژنە تەكنیكییەكانی پارتی و یەكێتی چارەسەركراون، دەشڵێت، تا ئێستا لەگەڵ یەكێتی قسەمان لەسەر پۆستەكانی حكومەت نەكردوە.
ئاوێنە: مەحمود محەمەد، وتەبێژی پارتی دیموکراتی کوردستان، ئەمڕۆ دوشەممە، لە لێدوانێكدا بۆ میدیاكانی حزبەكەی ڕایگەیاند: زۆربەی بابەتەکانی گفتوگۆی نێوان لیژنە تەکنیکییەکانی پارتی و یەکێتی چارەسەر کراون.
وتی، گفتوگۆکان گەیشتونەتە قۆناغی بیرۆکەی هاوبەش بۆ پێکهێنانی حکومەت و تەنیا یەک دو خاڵ ماون کە پێویستی بە گفتوگۆ لە ئاستێکی دیکەدا هەیە و لە چەند ڕۆژی داهاتودا گفتوگۆ دەکرێت و خاڵە ناکۆکەکان کۆتاییان پێ دەهێندرێت.
وتەبێژی پارتی ڕاشیگەیاند: هەردو لا گەیشتونەتە ئەو باوەڕەی دەبێت پەلە لە پێکهێنانی حکومەت بکرێت و تەنیا ڕای جیاوازمان لەسەر چۆنیەتی پێکهێنانی حکومەت و بەڕێوەبردنیەتی و تا ئێستا قسە لەسەر پۆستەکان نەکراوە.
لەبەشێكی دیكەی لێدوانەكەیدا مەحمود محەمەد لەبارەی مانگرتوانی سلێمانی وتی، ناڕازایەتی ڕێگەی پێدراوە، بەڵام کات و هۆکارەکەی جێگای پرسیارن، ئەوەی مانگرتوان داوای دەکەن حکومەتی هەرێمی كوردستان لەمێژە لەگەڵ بەغدا هەوڵی چارەسەرکردنی دەدات.