رێباز حەملان، بریكاری وەزارەتی دارایی عێراق رایگەیاند، ئەمڕۆ شەممە، تیمی وەزارەتی دارایی عێراق و هەرێم كۆتایی بە كارەكانیان دەهێنن بۆ رێكخستنەوەی میزان مراجەعەی هەرێم و سبەینێش تیمێكی تەكنیكی وەزارەتی دارایی هەرێم دەچنە بەغدا.

ئاوێنە: رێباز حەملان، ئەمڕۆ شەممە، لە راگەیەندراوێكدا وتی، لە کۆبونەوەی هاوبەشی وەزارەتی دارایی فیدراڵ و حکومەتی هەرێم لە 2024/12/15، وەزیری دارایی فیدراڵ بڕیاریدا تیمێک لە وەزارەتی دارایی فیدراڵ سەردانی هەولێر بکەن و لە ماوەی 10 رۆژدا بە هاوبەشی کاری پێکەوەیی بکەن لەگەڵ بەڕێوەبەرایەتی گشتی ژمێرکاری لە وەزارەتی دارایی هەرێم.

ئەوەشی خستۆتەڕو، تەواوی ئەو رێکارانەی بۆ رێکخستنەوەی میزان مراجەعەی مانگانەی هەرێم لە سەرەتای ساڵی 2024ەوە تا مانگی 11ی ئەمساڵ مانگ بە مانگ تەدقیق کرایەوەو رێکخرایەوە بەو شێوەیەی کە وەزارەتی دارایی فیدراڵ داوایکردبو لەسەر لیستی موچە و خەرجی تەشغیلی و ئەو برە پارانەی کە لە بەغداوە بۆ هەرێم نێردراون و ئەو پارانەی لە هەرێم لەسەر داهاتی ناوخۆ سەرفکراون بەتایبەت بۆ پرکردنەوەی موچەی مانگانە هەموی دیاری کراوە.

بریكاری وەزارەتی دارایی عێراق وتوشیەتی، هەردو تیمەکە (تیمی وەزارەتی دارایی فیدراڵ و تیمی وەزارەتی دارایی هەرێم) پاش ماندوبونێکی زۆر کە شەو و رۆژ کاریان کرد، ئەمڕۆ کۆتایی بە کارەکانیان دەهێنن.

رێباز حەملان وتوشیەتی، بڕیارە سبەی یەكشەممە بەڕێوەبەری گشتی ژمێرکاری لە وەزارەتی دارایی هەرێم و تیمی تەکنیکی وەزارەت بێنە بەغدا بۆ بەدواداچونی کارەکان، بە هەوڵی هەموان بەرەو ئەوە دەڕۆین کێشە هونەرییەکان کۆتاییان پێ بێت.