بەهای تمەنی ئێرانی بەرامبەر بە دۆلار بەردەوامە لە دابەزین، بەجۆرێک بەهای 100 دۆلار بە حەواڵە بەرامبەر بە هەشت ملیۆن و 300 هەزار تمەنە، ئەمەش لە رۆژێکدا زیاتر لە 285 هەزار تمەن لە بەهاکەی کەمبووەتەوە.

جەبار گۆران، وتەبێژی بازاڕی دراوی سلێمانی  راگەیاند، "سەرەکیترین هۆکار بۆ دابەزینی بەهای تمەن گۆڕانکارییە سیاسییەکانە، گرنگترینیان نزیکبوونەوەی وادەی گرتنەدەستی دەسەڵاتی کۆشکی سپییە لە لایەن دۆناڵد ترەمپەوە، چونکە بەتەواوەتی سیاسەتەکانی پێچەوانەی بەرژەوەندییەکانی ئێرانە".

گوتیشی، "ئەمساڵ ئێران کورتهێنانی بودجەی هەیە بە رێژەی 46٪، لەگەڵ ئەوەشدا خواستی بازرگانان لەسەر بازرگانیکردن بە تمەنەوە کەمیکردووە، لەلایەکی دیکەشەوە حکومەتی ئێران پاڵپشتیی حەواڵەی دەرەکیی زیادکردووە لەسەر بازرگانان، بەجۆرێک پێشتر نرخی ئاڵوگۆڕ بۆ هەر 100 دۆلارێک بە چوار ملیۆن و 200 هەزار تمەن دانرابوو، بەڵام ئێستا بووەتە شەش ملیۆن تمەن بۆ هەر 100 دۆلارێک".

نۆ ساڵ بەسەر رێککەوتننامەی وڵاتانی پێنج + یەک تێدەپەڕێت و لەوکاتەوە تاوەکو ئێستا بەهای تمەن بە بەردەوامی لە دابەزیندایە، ئەوە لەکاتێکدایە سەرەتای ئەمساڵ بەهاى 100 دۆلار بەرامبەر پێنج ملیۆن و 650 هەزار تمەن بووە.