دامەزراوەى کۆنتڕۆڵى جۆرى دەرمان بڵاوى کردەوە، دوای ئەنجامدانی دووبارە هەڵسەنگاندن و شیکردنەوەی تاقیگەیی بۆ دوو بەرهەمی دەرمانسازیی تەواوکەریی خۆراکی بە شێوەژەمی دەرمانسازیی قەترەی دەم کە ماددەی میلاتۆنینیان تێدابوو، دوای دەرچوونی ئەنجامەکان بە نەرێنی و دەرنەچوونیان “not comply” لە شیکردنەوەی تاقیگەیی، بڕیارماندا بە کشاندنەوەیان و لەناوبردنیان.

دامەزراوەى کۆنتڕۆڵى جۆرى دەرمانى هەرێمى کوردستان لەبارەى کشاندنەوەى دوو جۆرى دەرمان لە بازاڕەکان و لەناوبردنیان ڕاگەیەندراوێکى بڵاوکردەوە كه‌ تیایدا هاتووە، ئەنجامدانی دووبارە هەڵسەنگاندن و شیکردنەوەی تاقیگەیی بۆ دوو بەرهەمی دەرمانسازیی تەواوکەریی خۆراکی بە شێوەژەمی دەرمانسازیی قەترەی دەم کە ماددەی میلاتۆنینیان تێدابوو ئەنجامدرا.

دەشڵێن، دواى دەرچوونى ئەنجامەکان بە نەرێنی و دەرنەچوونیان “not comply” لە شیکردنەوەی تاقیگەیی، بڕیارماندا بە کشاندنەوەیان لە بازاڕەکان و لەناوبردنیان.

دەشڵێن، ئەو دوو جۆرە دەرمانە بریتین لە بەرهەمە  (HONORTONIN drops) بە ژماره باچی (HNR1715) درووستکراوی کارگەی (HONOR) و (melatonin drops) بە ژمارە باچی (23B038) درووستکراوی کارگەی (inalme) ن.

ئاماژە بەوەشکراوە، دوای ئەوەی لەلایەن تیمەکانی تاقیگەکانی بەڕێوەبەرایەتیمانەوە شیکردنەوەی تەواوەتی تاقیگەییان بۆ ئەنجامدرا، دەرکەوت کە تەنۆلکەی بینراو “visible particle”یان تێدایە و پێچەوانەی تایبەتمەندیی بەرهەمەکانن و شیاوی بەکارهێنان نین.

ئەوەش خراوەتەڕوو، هەردوو بەرهەمەکە پێشتر فرۆشتنیان لە بازاڕ راگیرابوو تا هەڵسەنگاندنی ئەنجامە نوێیەکان، هۆکاری خراپبوونی هەردوو بەرهەمەکەش، خراپ کۆگاکردن و گواستنەوەیان بووە.

لە کۆتایدا هاتووە، سەرجەم دەرمانخانە و کۆگاکانی دەرمان لە سەرجەم شار و شارۆچکەکانی هەرێمی کوردستان ئاگاداردەکەینەوە کە ئەو دوو بەرهەمە لە پشکنین دەرنەچوون و بە ڕێکاری زانستی دەرمانسازی و ژینگەیی لەناودەبرێن.