ماوەی 10 رۆژە گەڕان بەدوای ئەو کچە خوێندکارەی زانکۆ بەردەوامە، کە خەڵکی دیاربەکرە و لە کەناری دەریاچەی وان بێسەروشوێن بوو.
ئاوێنه: هێزەکانی پاراستنی سنوورە ئاوییەکان، ئاسایشی وان، تیمی ژێرئاو، تیمەکانی شارەوانی و ئافاد، 10 رۆژە بەدوای رۆژین کابایشی تەمەن 21 ساڵدا دەگەڕێن، کە لە ئێوارەی رۆژی 27ـی ئەیلولەوە بێسەروشوێنە.
رۆژین کە خوێندکاری قۆناغی یەکەمی زانکۆ بوو، ئێوارەی 27ـی ئەیلوول، پاش ئەوەی لە بەشە ناوخۆییەکەی نانی ئێوارە دەخوات، داوا لە هاوڕێکانی دەکات بۆ کۆکردنەوەی بەردنی رەنگاوڕەنگ بچنە کەناری دەریاچەی وان، بەڵام کەس لەگەڵی ناڕوات و بەتەنیا دەچێتە کەناری دەریاچەکە.
پێش چوونە دەرەوەشی بە ڤیدیۆ بە دایکی گوتووە بۆ کڕینی کێک و ئاو دەچێتە مارکێت. پاش ئەوەی هاوڕێکانی پەیوەندی پێوەدەکەن و وەڵامی نابێت، بەدوایدا دەگەڕێن و لە کەناری دەریاچەی وان مۆبایل، هێدفۆنەکەی، پارچە کێک و بوتڵی ئاوەکەی دەدۆزنەوە و رادەستی پۆلیسی دەکەن.
رۆژی یەکی ئەیلول بەمەبەستی لێکۆڵینەوە، مۆبایلەکەی رۆژین رەوانەی ئەنقەرە کرا، بەڵام بەهۆی بوونی وشەی تێپەڕ لەسەر مۆبایلەکەی، تاوەکو ئێستا نەتوانراوە تەماشای ناوەڕۆکەکەی بکرێت.
دوایین جار رۆژین لە کامێرای چاودێرییەوە بینراوە، لە بەشە ناوخۆییەکەیەوە بەرەو کەناری دەریاچەی وان رۆشتووە.
ماوەی 10 لێکۆڵینەوە لە سەرجەم ئەو کامێرایانە دەکرێت کە لە ناوچەکەدا هەن.
خێزانەکەی رۆژین لەبەرئەوەی گومانیان لە کەس نییە، هیچ سکاڵایەکیان دژی کەس تۆمارنەکردووە، بەڵام بەهۆی ئەوەی بەرپرسانی بەشە ناوخۆییەکەی درەنگ هەواڵی دیارنەمانی رۆژینیان بە خێزانەکەی داوە، سکاڵایان لەسەر تۆمارکراوە.
لە چەند رۆژی رابردوودا دایکی رۆژین برایە بنکەی پۆلیس و لەبارەی ئەگەری بوونی پەیوەندیی خۆشەویستی رۆژین و بوونی دوژمنداریی خێزانەکەی گوتەی لێوەرگیرا.
پاشانیش گوتە لە ئەندامانی خێزانەکەی، هاوڕێیانی بەشە ناوخۆییەکەی و 38 خزم و کوسکواری وەرگیرا.
تیمەکان لە نێو ئاوی وان، کەناری وان و دەورووبەری کەناری وان بەدوای رۆژیندا دەگەڕێن و بەهۆی دەستنەکەوتنی هیچ بەڵگەیەکیش، تاوەکو ئێستا هیچ کەسێک لەسەر بێسەروشوێنبوونی دەستگیرنەکراوە.
دیارنەمانی رۆژین لە کاتێکدایە، هێشتا بکوژانی نارین گورانی تەمەن هەشت ساڵ نەدۆزراونەتەوە کە 21ـی ئابی 2024 لە دیاربەکر و پاش گەڕانەوەی لە کۆرسی قورئان خوێندن بۆ ماڵەوە، دیارنەما و پاش 19 رۆژ تەرمەکەی لە کەناری جۆگەیەکی نزیک ماڵی خۆیان دۆزرایەوە.