راوێژکارێکی وەزارەتی دارایی حکومەتی هەرێمی کوردستان رایگەیاند، حکومەتی هەرێم تەنیا 658 هەزار و 189 فەرمانبەری هەیە، بەڵام کۆی ژمارەی موچەخۆرانی هەرێمی کوردستان زیاتر لە ملیۆنێک موچەخۆرن.

ئاوێنە: هاوڕێ کەمال، ڕاوێژکار لە وەزارەتی دارایی و ئابوریی هەرێمی کوردستان، ئەمڕۆ شەممە، لەبارەی ژمارەی فەرمانبەرانی هەرێمی کوردستان بە میدیای پارتی راگەیاند، حکومەتی هەرێمی کوردستان تەنیا 658 هەزار و 189 فەرمانبەری هەیە.

سەبارەت بە کۆی موچەخۆرانی هەرێمی کوردستانیش، ئەو ڕاوێژکارەی وەزارەتی دارایی وتی، کۆی ژمارەی موچەخۆرانی هەرێمی کوردستان زیاتر لە ملیۆنێکە، کە موچەی فەرمانبەرانی دامودەزگاکانی حکومەت، چاودێری کۆمەڵایەتی، خانەنشین، شەهیدان و ئەنفالکراوان لەخۆدەگرێت.

وتیشی، ئەوە لەکاتێکدایە بە پێی خشتەی "جیم" لە یاسای بودجە حکومەتی عێراق بە تێکڕای فەرمانبەرانی  چاودێری کۆمەڵایەتی و شەهیدان و خانەنشین، زیاترە لە چوار ملیۆن موچەخۆر.

ئاماژەی بەوەشدا، جیاوازی لەنێوان فەرمانبەر و موچەخۆردا هەیە، بەشێکی زۆر لە کەسوکاری شەهیدان و ئەنفالکراوان، موچەی ئەنفالکراوان و شەهیدان وەردەگرن، بەڵام فەرمانبەر نین.