وتەبێژی وەزارەتی گواستنەوە و گەیاندنی عێراق ڕایگەیاند، ئەو شەمەندەفەرانەی، كە لە چوارچێوەی پرۆژەی ڕێگای گەشەپێدان ڕەزامەندییان لەسەر دەدرێت، بەپێی سیستمێكی گونجاوی ئەوروپی بە خێرایی بەرز كار دەكەن، بەجۆرێک خێرایان دەگاتە ٣٠٠ كیلۆمەتر لە كاتژمێرێكدا واتە لە ماوەی یەك ڕۆژدا دەتوانێت بگاتە ئەوروپا.
مەیسەم سافی، وتەبێژی وەزارەتی گواستنەوە و گەیاندنی عێراق لە بارەی بەكارهێنانی شەمەندەفەری پێشكەوتوو لە پرۆژەی ڕێگەی گەشەپێدان و بەستنەوەی عێراق و بە ئەوروپا بۆ میدیا ناوخۆییەكان دەدوێت.
مەیسەم سافی ڕایگەیاند، پرۆژەی ڕێگای گەشەپێدان ١٥ وێستگەی شەمەندەفەر بۆ سەرنشین و كاڵا لەخۆدەگرێت و هەلی كار بۆ نزیكەی ١٠٠ هەزار كرێكاری ناوخۆیی دەڕەخسێنێت، هەروەها بەشێوەیەكی گشتیش دەبێتە هۆی دامەزراندنی شەش ملیۆن هاوڵاتیی.
ئاماژەی بەوەشكرد، ئەو شەمەندەفەرانەی، كە پێشكەوتوون و نێودەوڵەتین بۆ گواستنەوەی سەرنشین و كاڵا دەهێنرێنە عێراق، بەجۆرێک خێرایی ئەو شەمەندەفەرانە دەگاتە نزیكەی ٣٠٠ كیلۆمەتر لە كاتژمێرێدا، هەروەها، خێرایی شەمەندەفەرە بارهەڵگرەكانیش دەگاتە ١٤٠بۆ ١٦٠ كیلۆمەتر لە كاتژمێرێكدا.
باسی لەوەشكرد، ئەو شەمەندەفەرانە بەپێی سیستەمێكی وردی ئەوروپی كار دەكەن، كە هاوتان لەگەڵ سروشتی پڕۆژەكە، بەجۆرێک دەتوانرێت لە ماوەی یەك ڕۆژدا بگاتە ئەوروپا و لە ئێستاشدا قۆناغی سەرەتایی دیزاینی پڕۆژەكە تەواو بووە و لێكۆڵینەوەكان پێشكەوتنی بەدەستهێناوە و ڕێژەی تەواوبوون گەیشتووەتە ٩٠٪ پرۆسەی دیزاین بۆ هێڵی شەمەندەفەر گەیشتووەتە ٧٥٪
شایەنی باسە پڕۆژەی ڕێگەی گەشەپێدان، كە لە بەندەری فاوەوە دەستپێدەكات و بە درێژی هەزار و ٢٠٠ كیلۆمەتر بەناو خاكی عێراقدا دەچێتە توركیا و لەوێشەوە بۆ تەواوی جیهان، هەرچەندە لە ڕووە ئابوورییەكەیەوە داهاتێكی زۆر بۆ عێراق دەستەبەر دەكات، بەڵام لە چەندین لایەنی دیكەی سەربازیی و سیاسییشەوە كاریگەریی لەسەر ناوچەكە هەیە و بە مەترسییدار دادەنرێت بە تایبەت لە قەوارەی هەرێمی كوردستان.