کاک نەوشیروان لە لوتکەی سیاسیدا نوسی: پەرڵەمانتارانی گۆران لە خەمی کێدان؟ ئێستا دەتوانین بپرسین کورەکان و بەرپرسانی گۆڕان لە بزوتنەوەکە و حکومەتی هەرێم و لۆکاڵیەکان و پەرڵەمان لە خەمی کێدا بون.
بۆ خۆم وەک چالاکەوانێک لە رەوتی ئایندەی نیشتمان (رەوا) لە گەڵ هاورێکانم دەمێکە بەتەواوی ماڵئاواییمان لە بزوتنەوەی گۆڕان کردوە، بزوتنەوەیەک ساڵانێکی زۆر بە باوەر و هێزەوە کارمان بۆ کردوە و سەرکەوتو بوین بزوتنەوەکە لەسەر ئاستی دەرەوە ببێتە هێزێکی بەهێزی رکابەری سەرەکی پارتی و یەکێتی و خاوەن جەماوەرێکی بێئەندازە گەورە و بەرفراوان و دلسۆز، ئەنجامەکانی دەنگی گۆڕان لەدەرەوە بۆ پەرڵەمانی عێراق ئەو راستیە دەسەلمێنن. هەرچیمان کردوە خۆبەخش و ئارەزومەندانە بوە، بۆیە هەمیشە دەنگی زوڵاڵمان هەبوە و هەشە.
کاک نەوشیروان هەمیشە دەیگوت پارتی و یەکێتی هێزەکانی ٨٠ و ٧٠ یان هەیە گۆرانیش هێزی دەرەوەی هەیەم، ئێستاش ئیرادە و هێزی هزری گۆرانکاری لە دەرەوەی وڵات بەشێوازێکی جیاواز لە پێشو چالاک و بەردەوامە.  
دوای وەفاتی ئیتر سیاسەت لە گۆڕاندا کەوتە دەستی هاوکارە دێرینەکانی، مەخابن نەک تەنها لە ئاستی ئەو پرسیەریەتەدا نەبون بەڵکو بزوتنەوەی گۆڕان و هزری گۆرانکاریشیان بەرەو داکشانێکی کەمەرشکێنەر برد، گەیشتە ئاستێک متمانەی جەماوەر پێیان لە سفر نزیکبوەوە.
هەڵسوراوە دڵسۆزەکان زۆریان پێشنیاز و پرۆژە پێشکەش کرد، زۆر داوایان کرد چەند هەنگاوێک بگرنە بەر، یەکێک لەوانە کشانەوە بو لە حوکمرانیەکانی هەرێم، مەخابن نەک هەر گوێیان نەگرت کەوتنە بەخشینەوەی تۆمات و سزادان.
ئێمەمانان وەک چاودێرێکی چاوتیژ لە کار و کردار و گەندەڵی و رەوشتە ناشرینەکانی بەشێک لییان، تایبەت لە فەرمانرەواییەکاندا، بەئاگاین.
ئێستا رەوا و بزاف و ئاراستە و کەسایەتیە ئۆپزسیۆنە جدیەکانی تر لە کوردستان و دەرەوە هەنگاوی زۆریان بریوە بۆ کاری هاوبەش، بۆ سازکردنی زەمینەی لەبار بۆ سەرهەڵدانی ئۆپزسیۆنێکی جێگیر و باوەرپێکراو کە شایستەی متمانەی هاوڵاتیانی کوردستان لە باشور و بەشەکانی تری کوردستان بێت.
لەتبونی گۆڕان بە دو بەشەوە پارادۆکسێکی سیاسی و رێکخراوەییە، بەواتایەکی تر لایەنی نەرێنی و ئەرێنیشی هەیە.
مەخابن لەلایەک کورەکانی کاک نەوشیروان نەیان ویست، سەرەرای هەڵە و لادانەکانی دەسەڵاتی گۆڕان دوای وەفاتی کاک نەوشیروان، ئەو ئیرسە بەهادارەی باوکیان زیندو رابگرن و گەشەی پێبدەن، بەپێچەوانەوە ناکۆکی و جیاوازیەکانی ناو بزوتنەوەکەیان بەرفراوانتر و توندتر و دەکردەوە، کەوتنە کۆکردنەوەی چەند کەسانێک بە پاک و پیسەوە لە دەوری خۆیان و بۆ مەرامە جیاکانیان بەکاریان دەهێنان، تایبەت لە حکومەتی هەرێم و لۆکاڵیەکان. بەدرێژایی ئەو ساڵانە پەیامی سیاسی تایبەت بە خۆیان ئاشکرا نەکرد و ئینتباعێکیان خۆشەکرد کە تموحیان لە بزوتنەوەی گۆڕان نیە. پرسی هەڵبژاردن بۆ پەرڵەمانی کوردستان ئەم بێدەنگیە مەبەستدارەی ژێر ئاوی خستە سەر ئاو، قێزەوەنترین خاڵی وەرچەرخاندن لە دو روداودا دەرکەوت، یەکەم: هێزێکی چەکداری دەرەوی گۆڕانانیان هێنایە گردەکە و بۆ یەکەم جار لە مێژوی بزوتنەوەکە چەکدار چونە ناو چەند ژورێکی مەکۆی سەرەکی، دوەم: داخستنی دەروازەی گردەکە بەروی بەرپرسە ناکۆکەکان لە گەڵ کورەکانی کاک نەوشیروان، لەکەیەکی زۆر رەش هەروا ناسرێتەوە.
لایەنی رکابەر ناچارکران بەدوای ئەڵتەرنەتیڤدا بگەرێن، پاش پرسکردن لە کورەکانی کاک نەوشیروان و چەند کەسایەتی سیاسی ناسراو هەمو دانا احمد مجید یان وەک رێکخەری گشتی پەسندکرد. لە کۆبونەوەی بەشێکی جڤاتی نیشتمانی هەڵبژیردرا بۆ رێکخەری گشتی، ئەویش راستەوخۆ و راشکاوانە پەیامی گۆڕانی بڵاوکردەوە بە داوای لێبوردن و باسکردنی هەڵەکان دوای وەفاتی کاک نەوشیروان و رەتکردنەوەی تەوریسی سیاسی، راشیگەیاند گۆڕان لە حکومەتی هەرێم و لۆکاڵیەکان دەکشێنەوە.
هێشتا زوە مرۆڤ هەڵسەنگاندن بۆ بزوتنەوەی گۆڕان و رێکخەرەکەی بکات، وەک وتراوە کردار شەرتە، منیش دەڵێم نیەت لە کردار گرنگترە.
ئێستا پاشکۆکانی کورەکان بە پاساوی رێکخراوەیی دەیانەوێت ئەو روداوە پوچەڵ بکەنەوە، بۆچی؟
بۆ بەشێکی زۆر کەمینە کشانەوە لە دەسەڵات و حوکمرانی زەرەر و زیانێکی گەورە لە دەسکەوت و بەرژەوەندیە تایبەتیەکان دەدات، ئەمانە لەلایەن دەسەڵاتدارانەوە گیرفانیان زۆر چەور کراون بۆیە ناتوانن لە " چاکیان " هەڵگەرێنەوە. هەر ئەم کەمینەیە لە زۆر بواردا سەربەخۆیی کەسایەتییان هێندە کاڵبۆتەوە، عەرەب وتەنی: موسەیەرن نەک موخەیەر.
کورەکانی کاک نەوشیروان بەتەمان لە هەڵبژاردنەکان بۆ پەرڵەمانی کوردستان هەوادارانیان هانبدەن دەنگ بەلیستێکی نوێی دیاریکراو بدەن و ئەو لیستە بکەن بەدەسکەلایەک بۆ خۆیان. مەخابن ئەم کورانە هەڵسەنگاندنی باوکیان بۆ چەند کەسایەتیەکی لیستەکە کە زۆر نەرێنی بو پشتگوێ خستوە، لە دوا مانگەکانی ژیانیدا راشکاوانە باسی کردوە، لە کاتێکی گونجاودا چیرۆکی کاک نەوشیروان کە زۆر جار باسی کردوە لەسەریان بڵاودەکەمەوە.
دەربارەی دەستوری گۆڕان هەر ئەوەندە دەڵێم بیانویەکی بەسەرچوە چونکە دەستورەکە تەنراوە بە کەم و کوری و هەڵەی رێکخراوەیی، کاتێک کاک نەوشیروان بەفەرمانێک گروپی راوێژی لەناو گۆراندا دروستکرد و دەسەڵاتی پێدان دەیزانی لە گەڵ دەستورەکەدا ناگونجێت و لە ناچاری و ژێر فشار و دۆخی ئاڵۆز و تێکچوی گۆڕان ئەو بریارەی دا، بریارێک بەباشی بەسەر بزوتنەوەکە نەشکایەوە،
لایەنی ئەرێنی ئەم لەتبونە ئاشکرابونی نیەت و کارتەکانە، هەوادارانی گۆرانکاری ئێستا کە ژێر ئاوەکان سەر ئاو کەوتون دیدگا و هەڵسەنگاندنیان رو لە جیاوازی وەک لەوەی پێشتریان دەکات.