مێدیا لە کۆمەڵگا دواکەوتووەکان خۆی بەشێکەی گەورەیە لەو کێشەو گرفت و ئاڵۆزیە کۆمەڵایەتی و سیاسی و ئابوریانەی تەنگی بە کۆمەڵگاکان هەڵچنیوەو لە خرابترین حاڵەتدا دەستی خستووەتە بینە قاقایەوە.
ئەم مێدیایە نەهەڵگری دونیابینیەکی دیاریکراوە، نەسەر بە چەپە و نە سەر بە ڕاستە، نە هەڵگری شوناسێکی رون و ئایدیۆلۆژیایەکی دیاریکراوە و نەیش سەر بە قوتابخانەیەکی فکری دیاریکراوەو خاوەنی روئیایەکی جوانی و گەورەی نیشتیمانی و مەنتیقی و لۆژیکیە بۆ داهاتوو.
ئامادەیی ئەم تایپە لە مێدیا لە کۆمەڵگا، لە غیابی هۆشیاری تاک، دۆخێکی پڕ لە بەریەک کەوتن و مقۆمقۆو ڕقاوی بەرهەم هێناوە و ئەوەندەی بە تەنگ کۆمێنت و لایک و بەرزکردنەوەی کێرڤی بینەرانیەتی، خەمی گشتی نەکردووە بە خەمی خۆیەوە. ئەوەندەی بە تەنگ پاراستنی بەرژەوەندی حزبی سپۆنسەروکۆمپانیاو شەخسی خاوەن مێدیاکەیە، چارەگێک خەمی نیشتیمان و چاکەو خێری گشتی بە خەمی خۆی نازانێ.
ئەم جۆرە مێدیایە هەمیشە لەو گێژەنگەی خۆی بکەرو بەرهەمهێنەری سەرەکیە تیایدا، نقوم دەبێت و جاری واهەیە هیچ دەرچەو دەرگایەکی دەرباز بوون شک نابات. کە گەیشتە ئەم خاڵە بێ سڵەمینەوە لە دەرەنجامەکانی، پەلاماری ڕاست و چەپی دەدات و دیاردەکان دەکا بە حاڵەت و رووداوی زۆر ناخۆش و دواجار لە دوورەوە دەبێ بە بینەریان و دەسکەوتی مێدیایی و لایک و کۆمێنت دەچنێتەوەو باکی بەو گێکەنگە نیە خۆی بکەری سەرەکیە تیایدا.
کۆی چەمکی مێدیا لە هەرێمی کوردستان کەوتووەتە قەیرانيکی قووڵی شوناسەوە. نازانرێ تەبەنی چ شوناسێک دەکات و کام
ئامانجی نیشتیمانی و نەتەوەیی بەلایەوە گرینگە.
ئەم مێدیایە تەواو لە گشت فۆڕمەکانی جوانی کەوتووە. هەڵگری گوتارێکی جوانی مێدیایی و خاوەن شوناسێکی تایبەت نیە. پرسیاری گەورە دروست ناکات و گەر درووستیشی بکات هەرخۆی وەڵامدەرەوەی پرسیارە بچووکەکانە.
ئەم مێدیایە بە هەموو لق و فۆڕمەکانیەوە سەرقاڵی هاڕینی رۆح و جەستەی کۆمەڵگایە. لە رووبەری کۆمەڵگایەکدا ئامادەیی و هەژمونی خۆی بە هۆی بودجەو پارەدارکردنی لە لایەن بکەرە سیاسی و ئابوری و دامەزراوەکانی کۆمەڵگا، بە شێوەیەکی بەرچاو سەپاندووە. بەڵام لە ناواخن و دۆخی ناوەکیدا بە دەیان کێشەوگیروگرفت و ناکۆکیەوە ئالودەیە.
ئەم مێدیایە زۆر بە ئەسپاییەوە هەنگاو ئەنێ بەرەو ئاڕاستەو نامۆبوونێکی ئەسەفبار بە کۆمەڵگای کوردیەوە.
لە پانتای کاری سیاسی و جڤاکیدا زۆر بەهێزەوە خۆی دەخاتە نمایشەوە. بکەرو فیگەرو کاراکتەرە سیاسی و مێدیاییەکان زۆرترین رووبەر لە پانتای ئەم
مێدیایەیان داگیر کردووە و زۆرترین قسەش هەر ئەوان دەیلەن و بۆ هەر بابەت و پرسێک دوا وتەو بۆچوون هەر لای ئەوانە.
لە رووی تەکنیک و ئامێرو ئامرازو ئامێرەکانی پەیوەندی کردن و گەیاندندا، دەوڵەمەندو خاوەن ئیمکانیاتێکی باشە. بەڵام لە رووی بوونی کەوادیری بەتواناو بەهێزو خاوەن کاریزمای راگەیاندن و جوان نووس و رۆشنفکر و خاوەن ئایدیا، چەند دانەیەکی لێ دەربچێت، کڵۆڵ و داماوو هەژارو کەنار کەوتووە.
مێدیای کوردی ئەوەندەی سەرقاڵی پیاهەڵدان و گەورەکردنی کەسایەتیە سیاسی و خاوەن نفوزەکانی پانتای کاری سیاسی و بکەرانی جەمسەرەکانی هێزو دەسەڵاتی کۆمەڵگایە، نیو ئەوەندە بە تەنگ بنیادنانی کۆمەڵگەو تاکێکی مۆدێڕن و خاوەن دونیابینی و رۆشنگەری و پێشکەوتنەوە نیە. ئەوەندەی لە داڵانی زەق کردنەوەو پیاهەڵدانی ئەم و ئەوو بچوک کردنەوەی بەشەکەی تری کۆمەڵگادا گیری خواردووە، نیو ئەوەندە هەڵگری پەیامی ئاشتەوایی و پێکەوەژیان و هێورکردنەوەو ئارام کردنەوەی کۆمەڵگاو دۆخە قەیراناویەکان نیە. بەڵکو لە زۆر حاڵەتدا هەموو هەوڵەکانی ئەخاتە گەڕ بۆ بەگژیەکدا کردنی بەشەکانی کۆمەڵگاو پێکدادانی چین و توێژەکانی رووبەری کۆمەڵگادا.
ئەم مێدیایە تا سەر ئێسقان بە سیاسی و بە شەخسی کراوە و ئامانج و مەرامێکی شاراوە لە پشت بیرۆکەی دامەزراندیەوە ئامادەیی هەیە.
ئەشێ ئەم مێدیایە بۆ هەر پرسیارێکی ستراتیژی و جەوهەری لێی دەکرێت وەڵامێکی پێ بێت، لێ وەڵامەکان لە زۆر حاڵەتدا سەلمێنەرو قەناعەت پێ هێنەر و ئومێدبەخش نین. تەنانەت لە وێناکردنی ئازارەکانی تاکەکانی کۆمەڵگاو دۆخە قەیراناویەکانیشدا، سەربەخۆیی پێوە دیارنیەو هەر زوو هەست بە لایەنداری و پینەوپەڕۆکردنی کێشەکان و ئامانجەکانی پشت بابەتە ورووژێنەرەکانیەوە دەکەی.
کۆمەڵگا لە حاڵەتی ئامادەیی هەژمونی ئەم مێدیایەی سەربەخۆو خاوەن ئیڕادەو گوتارو بڕیارو دونیابینی و شوناسێکی مێدیایی دیاریکراوو نیە، لە دۆخێکی قەیراناویی رۆشنبیری و فەلسەفی و ئابوری و ئەخلاقی و سیاسیدا نقووم بووە. لە بری ئەوەی بەشێک بێت لە چارەسەر، فاکتەرێکی گەورەو زیانبەخشی بەشێکە لە تەنگژەو قەیرانەکان. فاکتەرێکی گەورەی بێ بەها کردن و ناشرین کردن و نائومێدی و دڕدۆنگی کۆمەڵگا و دروست کردنی گێژەنگ و زۆنگاوێکی مێدیایی، کەوا هیچ ئاماژەیەکی دڵخۆشکەرو هیوابەخشی بۆ داهاتوو، لێ ناخوێنريتەوە. بەڵکو سەرلەبەری چەمکی مێدیای کوردی بە رەنگ و بۆن و بەرامەو ئایدیاو دونیابینی و زهنیەتی بکەرە سیاسیەکانەوە تەنراوەو دۆخێکی دروست کردووە، تاک توانای برواپێکردن و قەناعەت هێنانی بە هیچ کام لە راگەیاندنەکان و سەرچاوەی هەوڵ و زانیاریەکان لەدەست داوەو نازانێ کێ ڕاستگۆیەو کێش بە شێوەیەکی سیستەماتیک و ئامانجدار بەردەوام درۆو چەواشەکاری دەرخوارد ئەدات.