2021-04-13 2705
بەرۆژوبونی مانگی رەمەزان‌و پەیوەندیی بەنەخۆشیی کۆڤید-١٩ (ڤایرەسی کۆڕۆنا)و ڤاکسینی دژە کۆڕۆنا.
پرسیاری یه‌كه‌م:
بەشێک لەھاوڵاتیان پرسیاری ئەوە دەکەن، ئایا وەرگرتنی ڤاکسینی دژە کۆڤید-١٩ (کۆڕۆنا) لەمانگی ڕەمەزاندا، ڕۆژوو بەتاڵ دەکاتەوە؟!
وەڵام: نەخێر، ڕۆژوو بەتاڵ ناکاتەوە، زانایانی ئایینی ئیسلام دەڵێن ڕێگەپێدراوەو دەتوانیت لەکاتی ڕۆژوبون وەریبگریت.
سەرچاوە: گۆڤاری بەناوبانگی پزیشکی (لانسێت).
تێبینیی: ھەندێ کەس نیشانە لاوەکییەکانی ڤاکسینەکە بەتوندی دەگرن وەک (تاو لەرزێکی زۆر، بێ ھێزیی، ئێش و ئازاری ماسوولکە)، بۆیە دەشێت بەھۆی ئەم ئازارانەوە نەتوانن ڕۆژووەکەیان بەردەوام بێت و پێویستیان بە وەرگرتنی دەرمان ھەبێت، بۆیە پێویستە لەم کاتانەدا ڕاوێژ بەپزیشک بکرێت بۆ شکاندنی ڕۆژووەکە.
پرسیاری دووەم:
ئایا ئەوەی توشی نەخۆشیی کۆڤید-١٩ بێت، دەتوانێت بەڕۆژوو بێت؟
وەڵام:
یەکێک لەڕێگەپێدراوەکانی شکاندنی ڕۆژوو لەشەریعەتی ئیسلام، نەخۆش کەوتنەو لەقورئانی پیرۆزیش ئاماژەی پێکراوە، بەڵام کامە نەخۆشیی؟ ئایا ھەموو نەخۆش کەوتنێک؟
بەدڵنیاییەوە نەخێر، ھەندێ نەخۆشیی تایبەت ھەن کە ڕێگەیان پێدراوە.
نەخۆشیی کۆڤید-١٩و ڤایرەسی کۆڕۆنا، لەبەشێک لەتووشبووان نەخۆشییەکە بە تایبەتی ئەوانەی تەمەنیان سەرووی ٦٠ ساڵەو نەخۆشیی درێژخایەنیان ھەیە، یان ئەوانەی بە قورسیی گرتوویانە و نەخۆش پێویستە لە نەخۆشخانە بخەوێندرێت، ئەمانە لە ڕووی پزیشکییەوە نابێت و ناشێت بە ھیچ جۆرێک ڕۆژوو بگرن.
بەشێکی تریان نەخۆشییەکەیان مامناوەندە، واتا لە ماڵەوەن و چارەسەر وەردەگرن، ئەمانە باشترە تا دوو ھەفتەی یەکەمی نەخۆشییەکە ڕۆژوو نەگرن. بەڵام، ئەم ژمارەی ڕۆژانە دەشێ کەمتر و زیاتر بێت، لەسەر بارودۆخی نەخۆشەکە و ڕاوێژ بە پزیشک، دەوەستێت.
ئەوانەی نەخۆشییەکەیان بەسووکیی گرتووە، باشترە ٢٤ کاتژمێر دوای نەمانی نیشانەکانیان، ڕۆژوو بگرن.
پرسیاری سێیه‌م:
ئایا ڕۆژوو گرتن لەڕەمەزان ئەگەری تووشبوون بەکۆڤید-١٩ زیاد دەکات؟
وەڵام:
نەخێر، ھیچ داتایەکی زانستیی باوەڕپێکراو نییە ئەوە بسەلمێنێت کە ڕۆژوو ئەگەری توشبوون بەنەخۆشییەکە زیاد دەکات.
بۆ ھەر پرسیارێک سەبارەت بەڕۆژوو بوونت لەکاتی تووشبوونت بە کۆڤید-١٩، باشترە ڕاوێژ بە پزیشکی پسپۆڕی ئەو بوارە بکەیت.
د.زانا دزەیی، پسپۆڕی نەخۆشییەکانی ھەناو