2021-03-02 2840
یەکەمین کاروانی ڤاکسینی سینۆفارمی چینی دژه کۆرۆنا گەیشتە هەرێمی کوردستان‌و وەزیری تەندروستی-یش ده‌ڵێت، هەفتەی داهاتو کاروانێکی دیکەی ڤاکسین دەگاتە عێراق‌و پشکی هەرێمی کوردستانیشی تێدا دەبێت.
ئاوێنه: د. سامان بەرزنجی، وەزیری تەندروستی هەرێمی کوردستان لەکاتی گه‌یشتنی ڤاکسینەدا رایگەیاند، پێنج هەزار ژەمە ڤاکسین لەلایەن چینەوە بۆ هەرێمی کوردستان دابینکرا. وتیشی، ڤاكسینه‌كه بۆ "تیمی گروپی ترسناک" کە پێویستە ڤاکسین وەربگرن به‌كارده‌هێنرێت.
راشیگه‌یاند، "لەگەڵ وەزیری تەندروستی عێراق لەپەیوەندیدا بوین‌و پێی راگەیاندوین هەفتەی داهاتو کاروانێکی دیکەی ڤاکسین دەگاتە عێراق‌و پشکی هەرێمی کوردستانیشی تێدا دەبێت".
پێشتر وەزاره‌تی تەندروستی هەرێم ئاماژه‌ی بۆ ئه‌وه‌كردبو كه هەشت سەنتەر لەهەرێمی کوردستان بۆ پێدانی ڤاکسینەکە دابینکراوە، ئەو سەنتەرانەش سیانیان لەسلێمانی‌و سێ لەهەولێرو دووانیان لەدهۆکە.
جه‌ختی له‌وه‌ش كردبوه‌وه كه پێکوتەکە سەرەتا دەدرێتە تیمە تەندروستییەکان‌و یەکەم کاروانی ڤاکسینەکە بەشی دوو هەزار کەس دەکات.
شەوی رابردو 50 هەزار ڤاکسینی کۆرۆنای سینۆفارم لەچینەوە گەیشتە عێراق‌و لەو بڕەش پێنج هەزاری بۆ هەرێمی کوردستان دەبێت.