2020-02-29 3140
ئاماری تووشبووانی ڤایرۆسی كۆرۆنا لە جیهاندا، گەیشتە زیاتر لە ٨٥ هەزار كەس، یەكەم حاڵەتی تووشبوون بە ڤایرۆسەكەش لە نیوزلەندا و وێڵز و لیتوانیا و بیلاڕوسیا و مەكسیك و نەیجیریا تۆماركرا، تا ئێستاش نزیكەی ٤٠ هەزار كەس چاكبوونەتەوە.
ئاوێنه: ژمارەی تووشبووان بە ڤایرۆسی كۆرۆنا لەسەر ئاستی جیهان لە بەرزبوونەوەدایە و بە پێی دواین ئامار، زیاتر لە ٨٥ هەزار كەس تووشی ڤایرۆسەكە بوون، نزیكەی ٣ هەزار كەسیش گیانیان لە دەستداوە و نزیكەی ٤٠ هەزار كەسیش چاكبوونەتەوە.
لە نیوزلەندا و وێڵز و لیتوانیا و بیلاڕوسیا و مەكسیك و نەیجیریاش یەكەم حاڵەتی تووشبوون بە ڤایرۆسەكە تۆماركراوە، وەزارەتی تەندروستی بەریتانیاش ئاشكرایكرد، یەكەم هاوڵاتی بەریتانی لەسەر كەشتی (دایمۆند پرێنسس) لە ژاپۆن، بەهۆی ڤایرۆسی كۆرۆناوە گیانی لە دەستداوە.
شایەنی باسە لە سوید حەوتەم حاڵەتی تووشبوون بە ڤایرۆسی كۆرۆنا تۆماركراوە. لە ئەڵمانیاش ٦٠ كەس دووچاری ڤایرۆسەكە بوون و زیاتر لە هەزار كەسیش خراونەتە ژێر كەرەنتینەوە.
هاوكات وەزارەتی تەندروستی كوەیتیش بڵاویكردەوە، زیاتر لە ٤٥ كەس لە وڵاتەكەی تووشی كۆرۆنا بوون، لە میسڕیش حەوت كەس تووشبوون، لە بەحرەین و ئیسرائیل و ئیتاڵیاش، ژمارەی تووشبووانی ڤایرۆسی كۆرۆنا بەرزبووەتەوە.