پەیوەندییە دیپلۆماسی و سیاسییەکانی نێوان ویلایەتە یەکگرتووەکانی ئەمریکا و ئیسرائیل ڕووبەڕووی تاقیکردنەوەیەکی سیاسیی نائاسایی بوونەتەوە. لە ناوخۆی ئەمریکادا، ڕەخنەکان لە دژی ئیدارەی جۆ بایدن بەهۆی بێتوانایی لە ڕاگرتن و جڵەوکردنی جەنگی ئیسرائیل لە کەرتی غەززە ڕوو لە زیادبوونە؛ لە هەمان کاتدا، پرسی جەنگ لەگەڵ ئێران ناڕەزایەتی لەنێو بنکەی جەماوەریی پارتی کۆمارییەکاندا دروست کردووە، کە پێیان وایە تێوەگلان لەو جەنگەدا دوورکەوتنەوەیە لە کارە لەپێشینەکانی هەڵمەتی هەڵبژاردنی دۆناڵد ترەمپ.
مەترسیی گەورەترین لێکترازان لە دوای قەیرانی سوێسەوە
ئاوێنە: لە ڕاپۆرتێکی شیکاریدا تیشک خراوەتە سەر داهاتووی ئەم پەیوەندییانە و تێیدا ئارۆن دەیڤد میلەر، توێژەر لە دامەزراوەی کارنیگی بۆ ئاشتیی نێودەوڵەتی، ئاماژە بەوە دەکات کە دۆخی ئێستا ڕەنگە زەمینە بۆ گەورەترین درز و لێکترازان لە پەیوەندییەکانی نێوان هەردوو وڵاتدا خۆش بکات لە دوای قەیرانی سوێس لە ساڵی ١٩٥٦؛ کاتێک دوایت ئایزنهاوەر، سەرۆکی ئەوکاتی ئەمریکا، دوای هێرشی ئیسرائیل بۆ سەر میسر بەبێ ئاگادارکردنەوەی واشنتن، تەلئەبیبی ناچار کرد لە نیمچەدوورگەی سینا بکشێتەوە.
سەرەڕای ئەم پێشهاتانە، ئامادەکارانی ڕاپۆرتەکە سەرنج بۆ ئەوە ڕادەکێشن کە ئەم گۆڕانکارییەی لە کەشی سیاسیی ئەمریکادا دروست بووە، تا ئێستا نەبووەتە هۆی گۆڕانکارییەکی هاوشێوە لە سیاسەتی فەرمیی دەرەوەی ئەمریکادا؛ بەوپێیەی واشنتن هێشتا لە نەتەوە یەکگرتووەکان پاڵپشتی لە ئیسرائیل دەکات و هەماهەنگییە هەواڵگری و سەربازییەکانی نێوان هەردوو وڵات بەردەوامن.
هۆشدارییەکان لە ناوخۆی ئیسرائیل سەبارەت بە سیاسەتەکانی نەتەنیاهۆ
لە ناوخۆی ئیسرائیلیشدا، ئەم پێشهاتانە هاوکاتن لەگەڵ قۆناغێک لە ناڕوونیی سیاسی. لەم چوارچێوەیەدا هۆشداری دەدرێت لە بەردەوامیی لێکەوتە نەرێنییەکانی سیاسەتەکانی بنیامین نەتەنیاهۆ لەسەر پەیوەندییەکان لەگەڵ واشنتن، تەنانەت ئەگەر دەسەڵاتیش لەو وڵاتەدا بۆ حکومەتێکی نوێ بگوازرێتەوە.
لەم بارەیەوە، شیرا ئیفرۆن، توێژەر لە دامەزراوەی "ڕاند" (RAND) ڕایگەیاندووە، کە ئیسرائیل بووەتە بارگرانییەکی سیاسی بەسەر شانی هەردوو پارتی دیموکرات و کۆمارییەوە لە ئەمریکا، و حکومەتەکەی نەتەنیاهۆش بووەتە مایەی بێزاری و دوورکەوتنەوە لای بەشێکی بەرفراوانی کۆمەڵگەی ئەمریکی.
لە لایەکی دیکەوە، یەعقوب کاتس، شیکەرەوەی سیاسی، هۆشداری دەدات لەوەی کە گۆڕینی سەرۆکوەزیرانی ئیسرائیل بەتەنها بەس نییە بۆ گەڕاندنەوەی متمانەی ئەمریکا، مەگەر ئەو گۆڕانکارییە هاوکات بێت لەگەڵ پێداچوونەوەیەکی ڕاستەقینە و کردەیی بە سیاسەتەکانی ئیسرائیل پەیوەست بە دۆسیەی ئێران، پرۆسەی کۆمەڵگە نشینگەییەکان (ئیستیتان) و توندوتیژیی نشینگەوانەکان لە کەرتی ڕۆژئاوا.
لە کۆتاییدا ڕاپۆرتەکە دەگاتە ئەو دەرەنجامەی کە پەیوەندییەکانی ئەمریکا و ئیسرائیل لەبەردەم تاقیکردنەوەیەکی سیاسیی نائاساییدان، بەڵام هێشتا کەلێن و جیاوازییەکی ڕوون لەنێوان پاشەکشەی کۆدەنگیی ناوخۆیی لە ئەمریکا لەسەر پشتگیریکردنی تەلئەبیب لە لایەک، و بەردەوامیی سیاسەتی فەرمیی واشنتن لە پشتگیریکردنی ئیسرائیل لە لایەکی دیکەوە، بەردەوامە.