پێگەی ئەكسیۆسی ئەمریكی دو بەرپرسی ئەو وڵاتەوە بڵاویكردۆتەوە كە ئیدارەی ترەمپ دانوستانی ناڕاستەوخۆ لەگەڵ ئێران رەت ناكاتەوەو كۆكردنەوەی هێزیش لە ناوچەكە لەلایەن واشنتۆنەوە بۆ چاوترساندنی ئێرانە.

ئاوێنە: دۆناڵد ترەمپ، سەرۆكی ئەمریكا، چەند جارێك ئەوەی دوپاتكردۆتەوە كە دەیەوێت لەگەڵ ئێران بگاتە رێككەوتن بەڵام هۆشداریشی داوە كە لە ئەگەری نەگەیشتن بە رێككەوتن ئەوا ئێران بۆردومان دەكرێت.

بەگوێرەی پێگەی ئەكسیۆش تاوەكو ئێستا كۆشكی سپی خەریكی گفتوگۆی ناوخۆییە لەنێوان ئەوانەی كە پێیان وایە ئەگەری هەیە لەگەڵ ئێران بگەنە رێككەوتن لەلایەك و ئەوانەی كە پێیان وایە دانوستان لەگەڵ ئێران كات كوشتنە و پشتیوانی لە وەشاندنی گوری سەبازی لە دامەزراوە ئەتۆمییەكانی ئەو وڵاتە دەكەن.

لەمیانی ئەمەدا وەزارەتی بەرگریی ئەمریكا دەستی كردوە بە ناردنی هێز و كەرەستەی سەربازی زۆر بۆ ناوچەكە.

یەكێك لە بەرپرسە ئەمریكییەكان كە قسەی بۆ ئەكسیۆس كردوە، وتویەتی، لە پشوی كۆتایی هەفتەدا، وەڵامی رەسمی ئێران بۆ نامەكەی ترەمپ، گەیشتۆتە دەستی سەرۆكی ئەمریكا.

ترەمپ پێشنیاری ئەنجامدانی دانوستانی راستەوخۆی لەگەڵ ئێران كردوە بەڵام ئێرانییەكان داوای دانوستانی ناڕاستەوخۆ بە نێوەندگیری عومان دەكەن.

بەرپرسە ئەمریكییەكە وتویەتی، ئیدارەی ترەمپ پێی وایە دانوستانی راستەوخۆ لەگەڵ ئێران سەركەوتوتر دەبێت، بەڵام ئەو شێوازی دانوستانەش رەت ناكاتەوە كە لەلایەن ئێرانەوە پێشنیار كراوەو دژی ئەوەش نییە كە عومان بە رۆڵی نێوەندگیریی لەنێوان هەردو وڵات هەڵسێت.

هەردو بەرپرسە ئەمریكییەكە وتویانە، تاوەكو ئێستا كۆشكی سپی هیچ بڕیارێكی نەداوەو گفتوگۆ ناوخۆییەكانی كۆشك بەردەوامن. یەكێكیان وتوشیەتی، لەدوای گۆڕینەوەی نامەكان، ئێستا كاتییەتی هەنگاوەكانی داهاتو بۆ دەستپێكردنی دانوستانەكان و دروستكردنی متمانە لەگەڵ ئێرانییەكان ببینین.

ئەوەش لەكاتێكدایە دوای ئەوەی ترەمپ رۆژی یەكشەممەی ئەم هەفتەیە رایگەیاند، ئێران بۆردومان دەكرێت ئەگەر لەگەڵمان نەگاتە رێككەوت، لێدوانەكانی نێوان تاران و واشنتۆن دژبەیەكدی توندییان بەخۆوە دیوە.

رۆژی دوشەممە، عەلی خامنەیی، رێبەری باڵای كۆماری ئیسلامی ئێران لە وەڵامی لێدوانەكانی ترەمپدا وێڕای ئەوەی بەدوری زانی ئەمریكا هێرش بكاتە سەر ئێران بەڵام وتی، لە ئەگەری هێرشدا وەڵامی توندییان دەبێت.

هەروەها ئێران بەڕەسمی یاداشتی ناڕەزایەتی خۆی دایە باڵیۆزخانەی سویسرا لە تاران، ئەوەش بەهۆی نەبونی پەیوەندیی دیپلۆماسی لەنێوان ئەمریكاو ئێران. لە یاداشتەكەیدا ئێران هۆشداری دا كە تاران بەتوندی و خێرا وەڵامی بۆ هەر هەڕەشەیەك دەبێت.

هەروەها فەرماندەی سوپای پاسدارانی ئێران لە لێدوانێكدا بۆ میدیای رەسمی وڵاتەكەی وتی، ئەمریكا 10 بنكە و 50 هەزار سەربازی لەناوچەكە هەیە، ئەوەی ماڵی لە شوشەیە بەرد ناگرێتە ماڵی كەس.

هەروەها عەلی لاریجانی، راوێژكاری خامنەیی رایگەیاند، ئەگەر ئەمریكا بۆردومانی دامەزراوە ئەتۆمییەكانی ئێران بكات، ئەوا ئێران لەژێر گوشاری رایگشتیدا ناچار دەبێت سیاسەتی خۆی بگۆڕێت و پەرە بە چەكی ئەتۆمی بدات.

وەزارەتی بەرگریی ئەمریكا دوێنێ سێشەممە رایگەیاند، وڵاتەكەی هێز و كەرەستەی سەربازیی زیاتر لە رێگەی ئاسمانەوە بۆ ناوچەكە دەنێرێت.

هەفتەی رابردوش پەنتاگۆن چەند فڕۆكەیەكی جۆری بی2ی بۆ بنكەی دیگۆ گارسیای سەربازی لەنێو دەریای هیندی رەوانە كرد.

یەكێك لەبەرپرسە ئەمریكییەكان بە ئەكسیۆسی وتوە، ترەمپ نایەوێت لەگەڵ ئێران بچێتە شەڕەوە، بەڵام پێویستی بە كۆكردنەوەی هێزی سەربازییە لەپێناو چاوترساندنی ئێران لە دانوستانەكان و ئامادەكاریی بۆ هەر جوڵەیەك لە ئەگەری شكستی دانوستانەكان و گرژبونی لەناوكاوی دۆخەكە.