ماڵپه‌ڕی ئاکسیۆس ئه‌مڕۆ چوارشەممە بە پشتبەستن بە سەرچاوەکان ڕایگەیاند، کۆشکی سپی بە جددی تاوتوێی پێشنیاری ئێران بۆ ئەنجامدانی دانوستانی ناڕاستەوخۆی ئەتۆمی دەکات، ئه‌وه‌ش له‌كاتێكدایه تره‌مپ وادەی دو مانگی بۆ تاران دیاریكردوه بۆ ئەنجامدانی ڕێککەوتنی نێوان هەردولا، هۆشداریشیدا لەوەی "ئەگەر ڕێککەوتن نەکرێت، بۆردومان ڕودەدات".
ئاوێنە: ماڵپه‌ڕی ئاکسیۆس لە ڕاپۆرتێکدا باسی له‌وه‌كردوه، تاوتوێكردنی بژارده‌كه‌ی ئێران له‌لایه‌ن واشنتنه‌وه لەکاتێکدایە کە واشنتن ژمارەی هێزەکانی ئەمریکا لە ڕۆژهەڵاتی ناوەڕاست زیاد دەکات وەک پێشبینییەک بۆ ئەوەی دۆناڵد ترەمپ، سەرۆکی ئەمریکا بژارده‌ی سه‌ربازی هەڵبژێرێت بۆ ئەنجامدانی هێرشی سەربازی بۆ سەر ئێران.
تره‌مپ وادەی دو مانگی بۆ تاران دیاریكردوه بۆ ئەنجامدانی ڕێککەوتنی نێوان هەردولا، هۆشداریشیدا لەوەی "ئەگەر ڕێککەوتن نەکرێت، بۆردومان ڕودەدات".
له نێو کۆشکی سپیدا مشتومڕێکی ناوخۆیی هه‌یه كە به‌ره‌یه‌كیان پێیوایە ڕێککەوتن ئەگەری هەیە، به‌ره‌كه‌ی دیكه‌ش دانوستانەکان بە بەفیڕۆدانی کات دەزانێت و پاڵپشتی ئاڕاستەکردنی هێرشەکانە بۆ سەر دامەزراوە ئەتۆمییەکانی ئێران.
بەوتەی بەرپرسێکی ئەمریکی، ترەمپ لە کۆتایی هەفتەدا وەڵامی فەرمی ئێرانی وەرگرتوە بۆ ئەو نامەیەی کە سێ هەفتە لەمەوبەر بۆ عەلی خامنەیی، ڕێبەری باڵای ئێرانی ناردوە.
لە کاتێکدا ترەمپ پێشنیاری دانوستانی ڕاستەوخۆی ئەتۆمی کرد، ئێران تەنیا ڕازی بو بە دانوستانی ناڕاستەوخۆ بە نێوەندگیری عومان.
بەرپرسێکی ئەمریکی ڕایگەیاند، ڕەنگە دانوستانە ڕاستەوخۆکان سەرکەوتوتر بن، بەڵام ئاماژەی بەوەدا کە ئیدارەی ئەو پێشنیارە ڕەتناکاتەوە کە ئێران پێشنیاری کردوە، هەروەها ناڕەزایی نییە بەرامبەر بە ڕۆڵی عومان وەک ناوبژیوان، وەک ئەوەی لە ڕابردودا ڕویداوە.
بەوتەی بەرپرسانی ئەمریکا تا ئێستا هیچ بڕیارێکی کۆتایی نەدراوە، لە کاتێکدا گفتوگۆ ناوخۆییەکان هێشتا بەردەوامن، بەرپرسێک وتی، "دوای ئاڵوگۆڕی پەیام، ئێستا خەریکی لێکۆڵینەوە لە هەنگاوەکانی داهاتوین بۆ دەستپێکردنی دانوستان و دروستکردنی متمانە لەگەڵ ئێرانییەکان".
لە هەمان کاتدا پنتاگۆن سەرقاڵی كۆكردنه‌وه‌ی هێزی سەربازی گەورەیە لە ڕۆژهەڵاتی ناوەڕاستدا، ئەوەش وایکردوە ترەمپ ئامادەبێت دەستبەجێ ڕێوشوێنی سەربازی بگرێتەبەر ئەگەر بڕیاریدا کاتەکەی تەواو دەبێت.
پنتاگۆن ڕۆژی سێشەممە ڕایگەیاند، هێزی زیادە و فڕۆكه‌ی جه‌نگی بۆ ناوچەکە دەنێرێت و فڕۆکە هەڵگرەکانی ترومان و ڤینسۆنیش لەوێ دەمێننەوە.
هەفتەی ڕابردو پنتاگۆن فڕۆکەی بۆمبڕێژکەری B-2ی نارد بۆ بنکەی دیێگۆ گارسیا لە زەریای هیندستان، هەنگاوێک کە بەرپرسێکی ئەمریکی ڕایگەیاندبو "جیا نییە" لەو وادەی دو مانگەی ترەمپ بە ئێرانی داوە.
فڕۆکە بۆمب هاوێژەکانی B-2 بە پێکهاتەیەکی سەرەکی هەر چالاکیەکی سەربازیی ئەگەری لە دژی دامەزراوە ئەتۆمییە ژێرزەمینییەکانی ئێران دادەنرێت، چونکە دەتوانن بۆمبی گەورە هەڵبگرن کە توانای چونە ناو ناوچه قوڵەکانی هەیە.
شۆن پارنێل، وتەبێژی پنتاگۆن لە بەیاننامەیەکدا ڕایگەیاندوە، ئەگەر ئێران یان بریکارەکانی هەڕەشە لە کارمەندان و بەرژەوەندییەکانی ئەمریکا لە ناوچەکەدا بکەن، ئەمریکا هەنگاوی یەکلاکەرەوە بۆ بەرگریکردن لە گەلەکەی دەگرێتەبەر.
بەوتەی بەرپرسێکی ئەمریکی، ترەمپ نایەوێت لەگەڵ ئێران بچێتە شەڕەوە، بەڵام پێویستی بەوەیە لە کاتی دانوستانەکاندا تواناکانی ڕێگریکردن بەهێز بکات و ئامادەبێت بۆ هەنگاونان ئەگەر دانوستانەکان شکستیان هێنا و دۆخەکە بە خێرایی پەرەیسەند.