ئەمڕۆ هەینی، نرخی نەوت لە بازاڕەكانی جیهاندا بەرزبونەوەی بەخۆیەوە بینی، ئەوەش لەسایەی هەوڵەكان بۆ كۆتاییهێنان بە شەڕی ئۆكرانیا.
ئاوێنە: سەرلەبەیانی ئەمڕۆ هەینی نرخی نەوت بەرزبونەوەی بەخۆیەوە بینی بەشێوەیەك كە یەك بەرمیل نەوتی خاوی برێنت لە ئێستادا بە 70 دۆلار 45 سەنت و هەروەها یەك بەرمیل نەوتی تەكساس بە 67 دۆلار 13 سەنت مامەڵەی پێوەدەكرێت.
بەرزبونەوەی نرخی نەوت دوای ئەوە هات كە دوێنێ پێنجشەممە، ڤلادیمیر پوتین، سەرۆكی روسیا رایگەیاند، وڵاتەكەی لەڕوی مەبدەئییەوە پشتیوانی لە پێشنیارەكەی ئەمریكا بۆ ئاگربەستی 30 رۆژە لە ئۆكرانیا دەكات بەمەرجێك ئەو كارە ببێتە هۆی ئاشتییەكی بەردەوام و لابردنی هۆكارەكانی دروستبونی شەڕەكەو چارەسەركردنی كۆمەڵێك لە وردەكاری دیكە.