قاسم ئەعرەجی، راوێژكاری ئاسایشی نیشتمانیی عێراق رایگەیاند، پەیوەندیی وڵاتەكەی لەگەڵ هاوپەیمانی نێودەوڵەتی پەیوەندییەكی ستراتیژییەو كاردەكەن بۆ زیاتر پەرەپێدانی لە سەرجەم بوارەكاندا.
ئاوێنە: بەپێی راگەیەندراوێكی نوسینگەكەی، ئەو قسانەی قاسم ئەعرەجی، ئەمڕۆ دوشەممە، لەمیانی كۆبونەوەیدا هاتون لەگەڵ لیوا كێڤن لیهی، فەرماندەی هاوپەیمانی نێودەوڵەتی لە عێراق و سوریا و وەفدێكی یاوەری.
بەگوێرەی راگەیەندراوەكە، لە كۆبونەوەكەدا باس لە دۆخی ئەمنی عێراق بەشێوەیەكی گشتی و هەروەها دۆخی سوریا بەتایبەتی كراوەو تاوتوێی ئەو ئاڵەنگارییانەش كراوە كە روبەڕوی ناوچەكە دەبنەوە لەگەڵ هەوڵە هاوبەشەكان بۆ بەهێزكردنی ئاسایش و سەقامگیری ناوچەكە.