وەزارەتی پەروەردەی هەرێم بڕیاریدا بە كەمكردنەوەی پڕۆگرامەكانی خوێندن بۆ تاقیكردنەوە گشتییەكانی پۆلی 12ی ئامادەیی و تاقیكردنەوەی نیشتمانی پۆلی نۆیەمی بنەڕەتی و ئەو بابەتانەشی دەستنیشان كردون كە بۆ تاقیكردنەوەكان داواكراو نین.
ئاوێنە: وەزارەتەكە، ئەمڕۆ پێنجشەممە، لە نوسراوێكدا كە ئاڕاستەی بەڕێوەبەرایەتییە گشتییەكانی پەروەردەكانی كردوە، رایگەیاند، بە لەبەرچاوگرتنی بەرژەوەندی قوتابیان بڕیاریانداوە بە كەمكردنەوەی پڕۆگرامەكانی خوێندن بۆ تاقیكردنەوە گشتییەكانی پۆلی 12ی ئامادەیی بە هەردو لقی زانستی و وێژەیی بۆ هەردو خولی یەكەم و دوەم و هەروەها بۆ تاقیكردنەوەی نیشتمانی پۆلی نۆیەمی بنەڕەتی.
ئەوەش خراوەتەڕو، بڕیارەكە تەنیا بۆ ساڵی خوێندنی 2024-2025 دەبێت.
لە نوسراوەكەیدا وەزارەتی پەروەردە ئەو بابەتانەشی دیاریكردون كە بۆ تاقیكردنەوەكان داواكراو نین.
هاوكات لیژنەی باڵای تاقیكردنەوەكان لە وەزارەتی پەروەردەی هەرێم لە راگەیەندراوێكدا وتویەتی، بەهۆی زۆری پشوەکانی هەڵبژاردنی پەرلەمانی کوردستان و پرۆسەی سەرژمێریی گشتیی و پشوەکانی سەری ساڵ، پرۆگرامەکانی خوێندنی پۆلی 9ی بنەڕەتی و 12ی ئامادەیی لەلایەن لیژنەكەیانەوە بۆ تاقیكردنەوەكان كەمكراونەتەوە.
