ئەنجومەنی نیشتمانی كورد لە سوریا(ئەنەكەسە)، رایگەیاند، محەمەد ئیسماعیل، سكرتێری پارتی دیموكراتی كوردستانی سوریا، كراوەتە سەرۆكی ئەنجومەنەكەیان لە جێی سلێمان ئوسو.
ئاوێنە: فەیسەڵ یوسف، وتەبێژی ئەنەكەسە، لە لێدوانێك بۆ ئاژانسی نۆرس پرێس رایگەیاند، ئەمڕۆ پێنجشەممە، لەمیانی كۆبونەوەی دەستەی سەرۆكایەتی ئەنەكەسەدا لە قامیشلۆ، بڕیاردراوە بە دانانی محەمەد ئیسماعیل وەك سەرۆكی ئەنجومەنی نیشتمانی كورد لە سوریا.
ئەوەشی خستۆتەڕو، دانانی محەمەد ئیسماعیل بە سەرۆكی ئەنەكەسە پاش كۆتاییهاتی خولی سەرۆكایەتی سلێمان ئوسو هاتوە كە شەش مانگە بۆ هەر خولێكی سەرۆكایەتی و رێگەش نادرێت بۆ دو خولی لەسەریەك خۆی كاندید بكاتەوە.
سلێمان ئوسو لە مانگی حوزەیرانی ساڵی رابردو كرابوە سەرۆكی ئەنەكەسە.
محەمەد ئیسماعیل، سكرتێری پارتی دیموكراتی كوردستانی سوریایە.
ئەنەكەسە لە ساڵی 2011 دامەزراوە كە چەند پارت و گروپێك لەخۆدەگرێت.
ئەنەكەسە بەشێكە لە هاوپەیمانی سوریا كە لەلایەن توركیاوە پشتیوانی دەكرێت.