میدیای نزیک لە پارتی بڵاویکردووەتەوە، یەکێتی بۆ پێکهێنانی کابینەی دەیەم سێ کاندید بۆ پۆستی جێگری سەرۆک وەزیران هەڵدەبژێرێت کە یەکێک لەوانە قوباد تاڵەبانییە کە پێشتریش لە دوو کابینە هەمان پۆستی هەبووە.
ئاوێنە: بەگوێرەی هەواڵێکی میدیای نزیک لە پارتی، هێشتا پارتی و یەکێتی لەبارەی پێکهێنانی کابینەی دەیەم نەگەیشتوونەتە رێککەوتنی کۆتایی و لە گفتوگۆی بەردەوامدان، بڕیارە ئەم هەفتەیە جارێکی دیکە کۆببنەوە. کۆبوونەوەی ئەم هەفتەیەش لەنێوان لیژنە تەکنیکییەکان بۆ نوسینەوەی کارنامەی کابینەی دەیەم دەبێت.
سەبارەت بە هەڵبژاردنی سێ کاندیدی یەکێتی بۆ جێگیری سەرۆک وەزیرانی هەرێم ئەو میدیایە ئاماژە بەوە دەکات، یەکێک لەو پۆستە باڵایانەی کە بەر یەکێتی دەکەوێت، پۆستی جێگری سەرۆک وەزیرانە کە قوباد تاڵەبانی لە دوو کابینەی پێشوودا لەو پۆستەدا بوو. هاوکات لە کابینەی دەیەمیشدا ئەو پۆستە بۆ یەکێتی دەبێت، بۆ ئەم پۆستەش یەکێتی سێ کاندیدی هەیە، بەهێزترینیان قوباد تاڵەبانییە.
ئەوەش خراوەتە روو، ئەگەر قوباد تاڵەبانی ئەمجارە بە پۆستی جێگری سەرۆک وەزیران رازی نەبوو و پۆستی باڵای دیکەی پێدرا، ئەوا دوو سەرکردەی دیکەی ناو یەکێتی زۆرترین چانسیان بۆ وەرگرتنی پۆستەکە دەبێت.
هەر بەگوێرەی میدیای نزیک لە پارتی، ئەو دوو سەرکردەیەی یەکێتی کەلە دوای قوباد تاڵەبانی زۆرترین چانسی وەرگرتنی پۆستەکەیان دەبێت "یەکەم؛ عیماد ئەحمەد، ئەندامی مەکتەبی سیاسی یەکێتییە، پێشتریش جێگری سەرۆک وەزیران بوو، دووەم؛ هاوڕێ شێخ دارۆیە، ئەویش ئەندامی مەکتەبی سیاسییە و بەرپرسی بەشی دارایی یەکێتییە. هاوکات باوکیشی پێشتر بەرپرسی بەشی دارایی یەکێتی بووە و دایکیشی کە نەرمین عوسمانە، وەزیری ژینگەی عێراق بووە".