نرخی ئەمپێری کارەبا لەشارەکانی هەرێم دیاریکراو لەسلێمانیش نرخه‌كه‌ گرانترینەو لەهەندێک شوێن گەیشتوەتە 22 هەزار دینار.
 
لەمانگی کانونی یەکەمدا، بەهۆی هاتنی شەپۆلێکی بەفرو باران کاتژمێرەکانی کارەبای نیشتمانی لەسه‌رتاسه‌رى هەرێم کەمبوه‌وه‌، ئەمەش بوە هۆی ئەوەی نرخی ئەمپێری موەلیدە ئەهلییەکان زیادبکات.
 
خۆران خۆرانی سەرۆکی ئەنجومەنی موەلیدە ئەهلییەکانی هەولێر ئاشكرایكردوه‌، "موەلیدە ئەهلییەکان لەمانگی کانونی یەکەمدا ڕۆژانە 15 کاتژمێرو نیو کاریانکردوە، نرخی ئەمپێرێک کارەبا بەگوێرەی کارکردنی موەلیدەکان لەناوچەیەک بۆ ناوچەیەکی دیکە جیاوازە، نرخەکە لەنێوان پێنج هەزار دینار تاوەکو 19 هەزار دینارە"، واته‌ نرخی یەک کاتژمێر کارکردنی موەلیدەکانی سەنتەری شاری هەولێر بە41 دینارەو لەناو بازاڕ 48 دینارە.
 
سەرۆکی ئەنجومەنی موەلیدە ئەهلییەکانی هەولێر ئه‌وه‌شى وتوه‌، "لەمانگی 12دا موەلیدەکان لەناوشاری هەولێر 351 کاژێر تاوەکو 460 کاژێر کاریانکردوە، نرخی یەک ئەمپێر لەنێوان 14 هەزارو 500 دینار تاوەکو 18 هەزار 750 دینار بوە".
 
بەوتەی خۆران خۆرانی، لەناو بازاڕدا نرخی یەک ئەمپێر لەنێوان هه‌شت هەزارو 750 دینار تاوەکو 10 هەزارو 500 دینار بوە، لەدەوروبەری هەولێرش نرخی ئەمپێرێک لەپێنج هەزارەوە دەستیپێکردوە تاوەکو 19 هەزارو 750 دینار.
 
له‌لایه‌كى دیكه‌وه‌ هەکار هروری نوێنەری موەلیدە ئەهلییەکانی پارێزگای دهۆک ئاشكرایكردوه‌، "بۆ مانگی 12 لەناوشاری دهۆک نرخی یەک ئەمپێری کارەبای موەلیدە لەنۆ هەزارو 250 دینارەوە دەستپێدەکات تاوەکو 20 هەزارو 250 دینار".

هەروەها عوسمان محەممەد سەرۆکی کۆمەڵەی موەلیدە ئەهلییەکانى سلێمانی باسى له‌وه‌كردوه‌، "نرخی یەک ئەمپێر بۆ مانگی کانونی دوەم لەنێوان 14 هەزار تاوەکو 22 هەزارە".