ئا: محەمەد هاوژین
چوار وەرزەی ساڵ ژمارەیەک ژنی بەتەمەن، لەبەر بەلدییەکەی سلێمانی خەریکی فرۆشتنی سەوزەن، ژنێکیان دەڵێت "سەری ساڵ بەمن چی؟! هەموو رۆژەكان بۆ من وەك یەك وان".
هەموو ئەو رێبوارانەی رێیان دەکەوێتە ناو بازاڕی سلێمانی‌و بە بەر بەلدییەكەدا تێدەپەڕن، دیمەنی ئەو ژنانە سەرنجیان رادەكێشێ كە بەدرێژایی ساڵ سەوزەو بەروبومی كشتوكاڵی خۆماڵی دەفرۆشن، هەر لەنێرگز‌و كنگرو چادرەو قەزوان‌و گەڵامێوەوە بگرە تا دەگات بەگوێزو مێوژو ترش‌و بنێشتی كوردی، ئەم ژنانە کە هەموویان شەروالیان لەپێدایە، لەبەیانییەوە روودەکەنە بەر بەلەدییەکەو تا دەمەو ئێوارەیەکی درەنگ کە دنیا تاریک دەکات خەریکی نان پەیداکردنن.
قومری (ناوێكی خوازراوە)، لەبەردەم خۆرەتاوی سەرەتای زستان‌و دواهەمین رۆژی ساڵی ٢٠٢٤دا، لەسەر سەکۆی بەر قادرمەکانی هۆتێل فەرەح دانیشتووەو خەریکی جگەرەکێشانەو دوکەڵ بە با کردنە، شەرواڵێکی شینی کاڵەوەبووی لەپێدایە، شانازی بەوە دەكات وەك خۆی دەڵێ بەئارەقی ناوچەوانی‌و بەهیلاكی‌و ماندوبوونێكی زۆر بژێویی ژیانی خۆی‌و منداڵەكانی دابین دەكات، كاتێك دەربارەی جەژنی سەری ساڵ پرسیاری لێدەكەیت، دەڵێت "سەری ساڵی چی؟! تەقەی سەرم دێ، هەموو رۆژەكان بۆ من وەك یەك وان، هەر ئیشكردن‌و راكە راكن".
قومری ئاماژە بەوە دەکات کە ئەگەر سەری ساڵ بۆ خەڵکێکی خواپێداو جەژن‌و مایەی کەیف‌و خۆشی بێت، ئەوا بۆ ئەوان بەپێچەوانەوە، ئەو بەئاوێنەی وت "ئەم دوای نیوەرۆو ئێوارەیە نەیانهێشت شتەکانمان کە زۆربەی گژو گیان، ببەینە سەر شۆستە سەرەکیەکەو بەناچار لەسەر قادرمەکان دامانناوە".
پەنجەی بەرەو شۆستەکە راکێشاو وتی "بژێویی ژیانی خۆم‌و خێزانەكەم لەسەر ئەم شۆستەیە دابین دەكەم، لەبەیانیەوە دێم‌و كە دنیا تاریك دەبێت دەڕۆمەوەو زۆر هیلاک دەبم".
به‌ر به‌له‌دیەکه، یەکێکە لەو شوێنانەی سلێمانی کە لەبەیانییەکی زوەوە تا درەنگانێکی شەو، بەسەرماو بەگەرما جمەی دێ لەخەڵک، به‌رده‌وام لەوێدا گوێت له‌ژاوه ژاوه، به‌قاڵه‌كان هاوار بۆ میوەکانیان ده‌كه‌ن، منداڵه‌كان راكه راكه‌یانه به‌دیار ئه‌و كه‌سانه‌ی شت ده‌كڕن‌و عه‌لاگه‌یان پێویسته، بۆنی بغورد ئەو ناوە پڕ دەکات‌و ئەوەی لەوێشدا زیاتر سەرنجی رێبواران رادەکێشێت دیمەنی ئەو ژنانەیە کە بەچنگەکڕێ بژێوی ژیانی خۆیان‌و منداڵەکانیان دابین دەکەن.
مەریەم (ناوێکی خوازراوە)، شەرواڵێکی خاکی لەپێدایەو سەرپۆشێکی رەشی داوە بەسەریدا، ئەو بەدەم ریزكردنی هەنجیرە وشکەوەکراوەکانی بەردەمییەوە، بەئاوێنەی وت "ئەمە هەنجیری خۆمانەو بەدەستی خۆم وشکم کردوەتەوەو زۆر خۆش‌و تازەیە".
پاشان دەستی بۆ گەڵامێوە بەستووەکانی بەردەمی درێژ کردو وتی "ئەم گەڵامێوانە، گەڵای ترێی سپین، هی شارباژێڕە، خۆم هەڵمگرتوون زۆر مزرو خۆشە".
كه دێته سه‌رباسی ژیان‌و چۆنیەتی هاتنی بۆ ناو بازاڕو هه‌ڵبژاردنی ئه‌م كاره قورسه لەم شوێنەی بازاڕدا کە قەرەباڵغی لێنابڕێت، بەکورتی ده‌ڵێت "باری مه‌جبورییه، خۆت فریای خۆت نەکەویت، كه‌س ئاوڕت لێناداته‌وه".
هێرۆ (ناوێکی خوازراوە)، ره‌نگی به‌ته‌واوی له‌بەر زۆریی مانەوە لەبەرخۆرەتاو بەهاوین‌و زستان رەش هەڵگەڕاوە، به‌ده‌سته زبره‌كانی خه‌ریكی هه‌ڵچنین‌و سه‌فته‌كردنی تاڵیشکەکانی به‌رده‌ستیه‌تی، ئه‌و ٦٠ ساڵی ته‌مه‌نی بەڕێدەکات‌و هه‌موو رۆژێك خواخوایەتی كه زۆر بفرۆشێت تاوه‌كو رۆژی ١٥ هه‌زاری دەستکەوێت، کاتێک پرسیاری جەژنی سەری ساڵی لێدەکەیت، بەجۆرێک لەتووڕەییەوە دەڵێت "من تاکو ١٠ هەزار پەیدا ئەکەم روحم دەردێت‌و ئەتوێمەوە، لەوانەیە هەشبێ بەمشەوی سەری ساڵە دەیان ١٠ هەزار دیناریی بۆ کەیفسازیی خۆی تەخشان‌و پەخشان بکات، كێ تۆ ده‌بینێت كه له‌م ناوجه‌رگه‌ی بازاڕه چۆن بەچنگەکڕێ بژێویی ژیانت په‌یدا ده‌كه‌یت؟!".
وتیشی "مێرده‌كه‌م توانای كاركردنی نه‌ماوه، دەمەوێ کچەکانم باش په‌روه‌رده بكه‌م‌و بێناز نەبن، سەری ساڵ بەمن چی؟! من هەموو ئێوارەیەک کە دەگەڕێمەوە بۆ ماڵ زۆر شەکەت‌و ماندووم، سەڕەرای ئەوەش هێشتا بەخەمی دابینکردنی نانی سبەینێوە دەچمە ناو جێگاوەو خەوم لێدەکەوێت".
ئاوێنە پڕۆژەیەکی میدیایی بەهاوبەشی لەگەڵ "قریب" بەڕێوەدەبات
ئاوێنە بۆ ماوەی دوو ساڵی داهاتوو پڕۆژەیەکی میدیایی هاوبەش بەسپۆنسەری "قەریب" بەڕێوەدەبات.
لەم پڕۆژە میدیاییەدا بایەخێکی تایبەت دەدرێت بەگەنجان‌‌و ژنان‌و پەیوەندییەکانی نێوان هەرێم‌و حکومەتی ناوەندی عێراق‌و هەڵبژاردنی کوردستان.
لەچوارچێوەی ئەم پڕۆژەیەدا، ئاوێنە بەشێوەیەکی پیشەیی کار لەسەر ئەو بابەتانە دەکات‌و چەندین راپۆرت‌و فیچەر پێشکەش بەخوێنەرو بینەرانی دەکات.
"قریب" بەرنامەیەکی هەرێمایەتییە بەسپۆنسەری ئاژانسی فەرەنسی بۆ پەرەپێدان "AFD"و لەلایەن ئاژانسی فەرەنسی بۆ گەشەپێدانی میدیایی CFI جێبەجێدەکرێت.