بانكی بازرگانیی عێراق بڕیاری كردنەوەی لقی لە هەردوو فڕۆكەخانەی نێودەوڵەتیی هەولێر و سلێمانی دا و دۆلار بە نرخی فەرمی دەدەن بە گەشتیاران.

ئاوێنه‌: بانكی بازرگانیی عێراق 'تی بی ئای' لە راگەیەندراوێكدا ئاماژەی بەوەكردووە، لە سەرەتای ئەم هەفتەیەوە فرۆشگاکانیان لە هەدوو فڕۆکەخانەی هەولێر و سلێمانی دەکەنەوە و بە بەردەوامی حەوت رۆژ لە هەفتەیەکدا و 24 کاتژمێری رۆژانە پێشوازیی لە گەشتیاران دەکەن.

پێشتر بەگوێرەی بڕیارێکی بانکی ناوەندیی عێراق، لە 14ـی تەمموزی 2024ـەوە پێدانی دۆلار بە گەشتیاران لە رێگەی فڕۆکەخانەکانى عێراق دەستیپێکرد، بەڵام بڕیارەکە لە فڕۆکەخانەکانی هەولێر و سلێمانی جێبەجێ نەکرا، ئەمەش بەهۆی پابەندنەبوونی بانکە فیدراڵییەکانی عێراق بۆ کردنەوەی لق لە فرۆکەخانەکانی هەولێر و سلێمانی.

بانکی ناوەندیی عێراق دەیەوێت دۆلار بگاتە دەستی گەشتیاری راستەقینە، بەگوێرەی بڕیارەکە هەر گەشتیارێک سێ هەزار دۆلاری بە نرخی فەرمی 132 هەزار دینار بۆ هەر 100 دۆلارێک پێدەدرێت، بەمەرجێک گه‌شتیار 18 ساڵی تەواو کردبێت و گەشتەکەشی بۆ ئەو وڵاتانە نەبێت کە لە لیستی سزاکانی ئەمریکادان .