ئەمڕۆ هەینی، نرخی نەوت بەردەوامە لە بەرزبونەوەو نرخی یەك بەرمیل نەوتی خاوی برێنت گەیشتە سەرو 72 دۆلار.
ئاوێنە: سەرلەبەیانی ئەمڕۆ هەینی، نرخی نەوت لە بازاڕەكانی جیهاندا بەرزبونەوەی بەخۆیەوە بینی بەشێوەیەك كە نرخی یەك بەرمیل نەوتی خاوی برێنت لە ئێستادا بە 72 دۆلار و 31 سەنت مامەڵەی پێوە دەكرێت.
هاوكات یەك بەرمیل نەوتی تەكساس لە ئێستادا بە 69 دۆلار و 36 سەنت مامەڵەی پێوە دەكرێت.
بەردەوامی بەرزبونەوەی نرخی نەوت لە دو رۆژی رابردودا لە سایەی ئەو زریانەوە دێت كە لە كەنداوی مەكسیك لە ئەمریكا بەرهەمهێنەرانی نەوتی ناچار كرد ناوچەكانی بەرهەمهێنان و پاڵاوتنی نەوت لە كەناراوەكانی لویزیانا چۆڵ بكەن.
ئەوەش لەكاتێكدایە كە لەماوەی چەند هەفتەی رابردودا نرخی نەوت بەشێوەیەكی بەرچاو دابەزی بەشێوەیەك كە رۆژی سێشەممەی ئەم هەفتەیە نرخی یەك بەرمیل خاوی برێنت گەیشتە خوار 70 دۆلار كە ئەوەش كەمترین نرخی نەوتی برێنت لە كۆتاییەكانی ساڵی 2021ەوە.