بڕیارەی هەفتەی داهاتو وردبنی لە ناوی كاندیدانی پەرلەمانی كوردستان كۆتایی پێ بێت و كۆمسیۆنی باڵای سەربەخۆی هەڵبژاردنەكان ناوی كاندیدەكان پەسەندبكات.
ئاوێنە: عیماد جەمیل، سەرۆکى تیمى رۆژنامەوانى کۆمیسیۆنى باڵاى سەربەخۆى ھەڵبژاردنەکانى عێراق، ئەمڕۆ هەینی، بە میدیای پارتی راگەیاند"هەفتەى داهاتو وردبینى دۆسیەى كاندیدان لەلایەن دەزگا پەیوەندارەکانى عێراق و هەرێمى کوردستان کۆتایی دێت و ئەنجومەنى کۆمیسیاران راستاندن بۆ ناوەکانیان دەکات."
لەبارەی ژمارەی ئەو كاندیدانەی لە وردبینی دەرنەچون، عیماد جەمیل وتی: "تاوەکو ئێستا حەوت كاندیدی هەڵبژاردنى پەرلەمانى کوردستان لە دواى وردبینى لە دۆسییەکانیان دورخراونەتەوە."
ئەوەش لەكاتێكدایە كە لە رۆژی 06-08-2024ەوە بەشێوەی ئەلیکترۆنی و کاغەز، لیستی ناوی كاندیدانی خولی شەشەمی هەڵبژاردنی پەرلەمانی کوردستان بە مەبەستی وردبینی بۆ وەزارەتەکانی ناوخۆ لە بەغدا و هەولێر و دەستەکانی دەستپاکی لە حکومەتی فیدراڵی و هەرێمی کوردستان نێردراوە.
سەرۆکى تیمى رۆژنامەوانى کۆمیسیۆنى باڵاى سەربەخۆى ھەڵبژاردنەکانى عێراق وتی: لە قۆناغى دواى پەسەندکردنى ناوى كاندیدان، چاپکردنى كارتی دەنگدان دەستپێدەکات.